"Invest Finance Bank" АЖ жаримага тортилди

Қайд этилишича, қўмита томонидан мазкур банк текширилган. Ўрганишлар давомида "Invest Finance Bank" АЖ Тошкент шаҳрининг бир қатор кўчаларида LED мониторли реклама объектларида "50 миллион танишларсиз, 50 кун фоизларсиз, 5 йилга, таътил учун, таъмирлаш учун, техника учун" кредит олиш мазмунидаги рекламани жойлаган. 

Ушбу реклама матни бўйича банкнинг расмий веб-сайти ўрганилганда, фақатгина "Infin Black" кредит картаси учун 50 миллион сўмгача, 60 ойга, йиллик 23,99 фоиздан кредит ажратилиши, картадан нақд пул ечиш 2 фоиз, картадан-картага пул ўтказиш 1 фоиз, алоҳида белгиланадиган фоиз ставкаси йиллик 25,55 фоиздан 54,75 фоизгача кўрсатилгани аниқланган. Кредит бўйича қўшимча шартлар ва муҳим маълумотлар ташқи рекламада кўрсатилмаган. 

Юқоридаги ҳолат юзасидан қўмита Махсус комиссияси томонидан "Реклама тўғрисида"ги ҳамда "Истеъмолчиларнинг ҳуқуқларини ҳимоя қилиш тўғрисида”ги қонун талаблари бузилиш аломатлари юзасидан "Invest Finance Bank" АЖга нисбатан белгиланган тартибда иш қўзғатилиб, молиявий жарима қўллаш ҳақида қарор қабул қилинган.