Kolumbiyada uyushtirilgan terakt oqibatida 19 kishi halok bo‘ldi

Shanba kuni notinch hisoblangan janubi-g‘arbiy Kauka departamentidan o‘tuvchi Panamerika trassasida sodir bo‘lgan portlashda avtobuslar va furgonlar yaroqsiz holga keldi.

Portlash kuchi bir nechta mashinani ag‘darib yubordi va yo‘lning qatnov qismida katta o‘ra hosil qildi.

Shanba oqshomida departament gubernatori 14 kishi halok bo‘lgani va 38 dan ortiq odam jarohatlanganini ma’lum qilgan bo‘lsa-da, yakshanba kuni ertalab Sud-tibbiy ekspertiza va kriminalistika milliy instituti 19 ta jasadni tekshirishni boshlaganini xabar qildi.

Harbiy qo‘mondon Ugo Lopes shanba kuni o‘tkazilgan matbuot anjumanida ma’lum qilishicha, hujumchilar avtobus va boshqa transport vositasi bilan yo‘lni to‘sib, harakatni to‘xtatganidan so‘ng bomba portlatilgan.

Hujum saylovchilar prezident Gustavo Petroning vorisini saylaydigan umummilliy saylovlardan bir oy oldinroq sodir etildi.

Petro ushbu portlashda Janubiy Amerika mamlakatining eng ashaddiy jinoyatchisi Ivan Mordiskoni aybladi va uni marhum kokain qiroli Pablo Eskobarga qiyosladi.

So‘nggi ikki kun ichida ikki departamentda 26 ta hujum qayd etilgan. Rasmiylar bu hududlardagi harbiylar va politsiya safini kuchaytirgan, dedi Mudofaa vaziri Pedro Sanches.

Xavfsizlik – 31-may kuni bo‘lib o‘tadigan prezidentlik saylovining asosiy masalalaridan biridir. Siyosiy zo‘ravonlik o‘tgan yilning iyun oyida, prezidentlik poygasida yetakchilik qilayotgan yosh konservator nomzod Migel Uribe Turbay poytaxt Bogota shahrida saylovoldi tashviqoti paytida otib ketilgach, diqqat markaziga chiqdi.

Petroning qurolli guruhlar bilan muzokara o‘tkazish borasidagi bahsli siyosati tashabbuskori, so‘lchi senator Ivan Sepeda esa so‘rovnomalarda peshqadamlik qilmoqda.

Uning ortidan isyonchi guruhlarga qarshi keskin kurashishga va’da bergan o‘ng qanot nomzodlari Abelardo de la Espriella va Paloma Valensiya kelmoqda.

Har uchala nomzod ham o‘lim bilan tahdid qilingani va kuchaytirilgan xavfsizlik choralari ostida saylovoldi tashviqotini olib borayotganini ma’lum qilgan.