Har yili 100 ta she’riy konsert davlat hisobidan moliyalashtiriladi

Rasmiy xabarga ko‘ra, shoir va yozuvchilarga yiliga kamida 50 ta eng sara asar uchun ijodiy buyurtma berish yo‘lga qo‘yiladi. 

Har yili o‘zbek adabiyotining eng yaxshi 10 ta asari xorijiy tillarga tarjima qilinadi va mualliflar ishtirokida chet ellarda taqdimotlar o‘tkaziladi.

Bundan buyon Yozuvchilar uyushmasi tavsiyasi asosida chop etiladigan kitoblarning qog‘oz bilan bog‘liq xarajati davlat tomonidan qoplanadi. 

Shuningdek, yosh iste’dodlarning she’riyat bilan san’atni uyg‘unlashtirgan she’riy konsertlar tashkil etish tashabbuslari qo‘llab-quvvatlandi. 

Ushbu yo‘nalishda taqdim etiladigan eng sara 100 ta loyiha davlat hisobidan moliyalashtiriladi. 

O‘n kun avval Milliy kitobxonlik harakatiga start berildi. Bu harakatga yoshlarni keng jalb qilish uchun joylarda kitob do‘konlari, kutubxona va “buk-kafe”lar yanada ko‘paytiriladi. 

Har bir viloyat hokimiga yil yakunigacha chekka va olis hududlardagi 50 tadan 100 tagacha mahallada namunali mahalla kutubxonasi va kitob do‘konlarini tashkil qilish topshirildi.

Endilikda har yili 1 ming nafar shoir va yozuvchilar, madaniyat va san’at vakillari, muzey xodimi va rassomlarga uy-joy olish uchun ipoteka krediti dastlabki to‘lovining 50 foizi qoplab beriladi. 

Ijodiy tashkilotlar, madaniyat va san’at muassasalariga boshqa hududdan kelib ishlayotgan soha vakillari ham ko‘p. Bugundan boshlab ularga uy-joy ijarasi uchun Toshkent shahrida oyiga 2,5 million so‘mgacha, viloyatlarda 1 million 600 ming so‘mgacha xarajatini qoplab berish yo‘lga qo‘yiladi. 

Har yili faoliyatida yaxshi natijaga erishgan 1 ming nafar soha xodimi davlat tibbiy sug‘urta jamg‘armasi hisobidan bepul davolanadi. 

Yana 2 ming nafar ijodkorga davlat tomonidan tibbiy sug‘urta paketi taqdim etiladi. Kamida 10 yil ishlagan xodimlarga sanatoriylariga bepul yo‘llanma beriladi. 

15-iyundan xalq artisti, xalq shoiri, xalq yozuvchisi kabi yuksak faxriy unvonga ega ijodkorlarning aeroport va vokzallardagi VIP zallardan bepul foydalanishi ta’minlanadi.