Ҳар йили 100 та шеърий концерт давлат ҳисобидан молиялаштирилади

Расмий хабарга кўра, шоир ва ёзувчиларга йилига камида 50 та энг сара асар учун ижодий буюртма бериш йўлга қўйилади. 

Ҳар йили ўзбек адабиётининг энг яхши 10 та асари хорижий тилларга таржима қилинади ва муаллифлар иштирокида чет элларда тақдимотлар ўтказилади.

Бундан буён Ёзувчилар уюшмаси тавсияси асосида чоп этиладиган китобларнинг қоғоз билан боғлиқ харажати давлат томонидан қопланади. 

Шунингдек, ёш истеъдодларнинг шеърият билан санъатни уйғунлаштирган шеърий концертлар ташкил этиш ташаббуслари қўллаб-қувватланди. 

Ушбу йўналишда тақдим этиладиган энг сара 100 та лойиҳа давлат ҳисобидан молиялаштирилади. 

Ўн кун аввал Миллий китобхонлик ҳаракатига старт берилди. Бу ҳаракатга ёшларни кенг жалб қилиш учун жойларда китоб дўконлари, кутубхона ва “бук-кафе”лар янада кўпайтирилади. 

Ҳар бир вилоят ҳокимига йил якунигача чекка ва олис ҳудудлардаги 50 тадан 100 тагача маҳаллада намунали маҳалла кутубхонаси ва китоб дўконларини ташкил қилиш топширилди.

Эндиликда ҳар йили 1 минг нафар шоир ва ёзувчилар, маданият ва санъат вакиллари, музей ходими ва рассомларга уй-жой олиш учун ипотека кредити дастлабки тўловининг 50 фоизи қоплаб берилади. 

Ижодий ташкилотлар, маданият ва санъат муассасаларига бошқа ҳудуддан келиб ишлаётган соҳа вакиллари ҳам кўп. Бугундан бошлаб уларга уй-жой ижараси учун Тошкент шаҳрида ойига 2,5 миллион сўмгача, вилоятларда 1 миллион 600 минг сўмгача харажатини қоплаб бериш йўлга қўйилади. 

Ҳар йили фаолиятида яхши натижага эришган 1 минг нафар соҳа ходими давлат тиббий суғурта жамғармаси ҳисобидан бепул даволанади. 

Яна 2 минг нафар ижодкорга давлат томонидан тиббий суғурта пакети тақдим этилади. Камида 10 йил ишлаган ходимларга санаторийларига бепул йўлланма берилади. 

15 июндан халқ артисти, халқ шоири, халқ ёзувчиси каби юксак фахрий унвонга эга ижодкорларнинг аэропорт ва вокзаллардаги VIP заллардан бепул фойдаланиши таъминланади.