Oʻzbekistonda AES qurilishiga Italiya tomoni ham koʻmaklashadi

Safar doirasida Liguriya mintaqasi rahbariyati, Genuya maʼmuriyati, Savdo palatasi, texnologik universitetlar va Italiyaning energetika kompaniyalari bilan bir qator muzokaralar oʻtkazildi.

20 oktabr kuni delegatsiya aʼzolari Ansaldo Energia xoldingi hamda uning atom energetikasi texnologiyalariga ixtisoslashgan boʻlinmasi — Ansaldo Nucleare rahbariyati bilan uchrashdi. Xolding Yevropada energetika uskunalari, jumladan, bugʻ va gaz turbogeneratorlarini loyihalash, ishlab chiqarish va yetkazib berish sohasidagi yetakchi kompaniyalardan biri hisoblanadi.

Uchrashuvda Oʻzbekistonda birinchi atom elektr stansiyasini qurish loyihasi doirasida texnologiyalarni integratsiya qilish hamda italiyalik hamkorlarning yordamchi tizim yechimlarini mamlakatimiz iqlimiga moslashtirish masalalari muhokama qilindi.

Italiya tomoni atom stansiyalarida xavfsizlik tizimlarini yaratish va ular uchun dasturiy taʼminot ishlab chiqish, asosiy va yordamchi uskunalarni yetkazib berish, shuningdek, Xitoy, Belgiya, Sloveniya, Vengriya va Ukrainadagi AESlarda xizmat koʻrsatish va sarflangan yoqilgʻi bilan ishlash boʻyicha tajribasi haqida maʼlumot berdi.

Tomonlar xolding kompaniyalarini Oʻzbekistondagi AES qurilishi loyihasini nazorat qilish hamda samarali yordamchi yechimlar ishlab chiqish uchun texnik maslahatchi sifatida jalb etish imkoniyatlarini ham koʻrib chiqdilar.

Bundan tashqari, Ansaldo Nucleare kompaniyasi bilan sarflangan yodroviy yoqilgʻini boshqarish tizimlarini qoʻllash va radioaktiv chiqindilar bilan ishlash boʻyicha hamkorlik yoʻnalishlari muhokama etildi.

Shu bilan birga, italiyalik mutaxassislar Oʻzbekistonda atom sohasini rivojlantirish maqsadida normativ-huquqiy baza yaratish, litsenziyalash boʻyicha maslahatlar berish, hamda ikki mamlakat manfaatlari yoʻlida ilmiy-tadqiqot va tajriba-konstruktorlik ishlarini tashkil etishga qiziqish bildirdi.