Ўзбекистонда АЭС қурилишига Италия томони ҳам кўмаклашади

Сафар доирасида Лигурия минтақаси раҳбарияти, Генуя маъмурияти, Савдо палатаси, технологик университетлар ва Италиянинг энергетика компаниялари билан бир қатор музокаралар ўтказилди.

20 октябрь куни делегация аъзолари Ansaldo Energia холдинги ҳамда унинг атом энергетикаси технологияларига ихтисослашган бўлинмаси — Ansaldo Nucleare раҳбарияти билан учрашди. Холдинг Европада энергетика ускуналари, жумладан, буғ ва газ турбогенераторларини лойиҳалаш, ишлаб чиқариш ва етказиб бериш соҳасидаги етакчи компаниялардан бири ҳисобланади.

Учрашувда Ўзбекистонда биринчи атом электр станциясини қуриш лойиҳаси доирасида технологияларни интеграция қилиш ҳамда италиялик ҳамкорларнинг ёрдамчи тизим ечимларини мамлакатимиз иқлимига мослаштириш масалалари муҳокама қилинди.

Италия томони атом станцияларида хавфсизлик тизимларини яратиш ва улар учун дастурий таъминот ишлаб чиқиш, асосий ва ёрдамчи ускуналарни етказиб бериш, шунингдек, Хитой, Бельгия, Словения, Венгрия ва Украинадаги АЭСларда хизмат кўрсатиш ва сарфланган ёқилғи билан ишлаш бўйича тажрибаси ҳақида маълумот берди.

Томонлар холдинг компанияларини Ўзбекистондаги АЭС қурилиши лойиҳасини назорат қилиш ҳамда самарали ёрдамчи ечимлар ишлаб чиқиш учун техник маслаҳатчи сифатида жалб этиш имкониятларини ҳам кўриб чиқдилар.

Бундан ташқари, Ansaldo Nucleare компанияси билан сарфланган ёдровий ёқилғини бошқариш тизимларини қўллаш ва радиоактив чиқиндилар билан ишлаш бўйича ҳамкорлик йўналишлари муҳокама этилди.

Шу билан бирга, италиялик мутахассислар Ўзбекистонда атом соҳасини ривожлантириш мақсадида норматив-ҳуқуқий база яратиш, лицензиялаш бўйича маслаҳатлар бериш, ҳамда икки мамлакат манфаатлари йўлида илмий-тадқиқот ва тажриба-конструкторлик ишларини ташкил этишга қизиқиш билдирди.