Азиз Воитов: Қамоққа олинган собиқ вазирнинг судидан нималар маълум?

Азиз Ботирович Воитов — 1980 йил 29 май куни Тошкент шаҳрида туғилган. 2001 йилда Тошкент молия институтида, 2004 йилда эса Тошкент ирригация ва мелиорация институтларида ўқиган. 2010 йилда Ўзбекистон Республикаси Президенти ҳузуридаги Давлат ва жамоат қурилиши Академиясининг олий бизнес мактабини тамомлаган. 

Азиз Воитов 2000-2017 йилларда Ўзбекистон Республикаси Ташқи иқтисодий фаолият миллий банкида турли лавозимларда ишлаган. 2017-2020 йилларда "Ўзсаноатқурилишбанк" АТБ Бошқаруви раиси вазифасини бажарувчи лавозимларида фаолият юритган. 

2020 йил март ойидан Ўзбекистон Республикаси инвестициялар ва ташқи савдо вазирининг биринчи ўринбосари лавозимини эгаллаган. Президент фармони билан 2022 йил 29 августдан 2023 йил 24 октябргача Ўзбекистон қишлоқ хўжалиги вазири бўлган. 

Собиқ вазир қамоққа олинди 

Ўтган йилнинг 25 октябрида ишдан бўшатилган Азиз Воитов орадан бир неча ҳафта ўтиб, аниқроқ қилиб айтадиган бўлсак, 13 декабрь куни қўлга олинган. Унга доир иш 14 декабрь куни соат 00:10 да жиноят ишлари бўйича Яшнобод туман судининг ёпиқ суд мажлисида кўрилган. 

Маълум бўлишича, собиқ вазир Жиноят кодексининг 167-моддаси (ўзлаштириш ёки растрата йўли билан талон-торож қилиш) 3-қисми "а" банди ва 205-моддаси (ҳокимият ёки мансаб ваколатини суиистеъмол қилиш) 2-қисми "а" бандида назарда тутилган жиноятларни қилганликда гумонланиб қўлга олинган. 

Расмий оммавий ахборот воситаларида ёзишича, Воитов мансаб ваколатини суиистеъмол қилган ҳолда 2022-2023 йилларда Қишлоқ хўжалигида хизматлар кўрсатиш агентлиги директорига 'зудлик билан ва муаммосиз қарз ажратиб бериш тўғрисида' ноқонуний топшириқ берган. Бунинг оқибатида эса “Қишлоқ хўжалиги маҳсулотларини етиштириш харажатларини молиялаштириш ва уларни харид қилиш тизимини такомиллаштириш чора-тадбирлари тўғрисида”ги қарор талабига зид равишда бир неча тадбиркорлик субъектларига қарз маблағлари ноқонуний ажратилиб, давлатнинг 9,8 млрд сўм маблағи растрата қилиш йўли билан талон-торож қилинган. 

Бош прокурор ўринбосари судга илтимоснома киритиб, гумон қилинувчи А.Воитов томонидан давлат ва жамият манфаатларига етказилган жуда кўп миқдордаги моддий зарар қопланмаганини, у очиқда қолган тақдирда дастлабки терговдан яшириниши, жиноий ҳаракатларни давом эттириши, гувоҳларни кўндириши ва далилларни йўқ қилиши мумкинлигини инобатга олиб, унга нисбатан қамоққа олиш тарзидаги эҳтиёт чорасини қўллашни сўраган. 

Суд Бош прокурор ўринбосарининг илтимосномасини қаноатлантирган ҳолда Воитовга нисбатан қамоққа олиш тарзидаги эҳтиёт чорасини қўллашни лозим топган. Шунингдек, у ДХХ тергов ҳибсхонасига жойлаштирилиши белгиланган. 

Воитов иши судда кўриб чиқилмоқда 

Орадан бир неча ой ўтиб, жорий йилнинг 12 август куни Олий суд томонидан Азиз Воитовнинг иши судга оширилгани маълум қилинди. Унда Воитов иши 15 август куни Жиноят ишлари бўйича Миробод туман судида кўриб чиқилиши маълум қилинган. 

15 август куни Олий суд матбуот котиби Азиз Абидов томонидан берилган маълумотга кўра, Воитовга оид иш яна бир ҳибсга олинган собиқ амалдор Қишлоқ хўжалигида хизматлар кўрсатиш агентлиги директори лавозимида ишлаган Ҳусниддин Каримовга оид иш билан бирлаштирилган. Дастлабки эшитув Жиноят-протсессуал кодексининг 405-6-моддаси талабига мувофиқ ёпиқ суд мажлисида ўтказилиб, айнан шунинг натижаси ўлароқ иккита жиноят иши битта иш юритувга бирлаштирилган.

"Азиз Воитов ва бошқаларга (жами 50 киши) оид жиноят ишини жиноят ишлари бўйича Миробод туман суди томонидан биринчи инстансияда кўриб чиқиш бўйича очиқ суд жараёни 2024 йил 5 сентябрь соат 15:00 да жиноят ишлари бўйича Юнусобод туман суди биносида бошланади", 

дейди Азиз Абидов 

Тергов органининг айблов хулосасига кўра, судланувчилар Жиноят кодексининг:
167 моддаси — Ўзлаштириш ёки растрата йўли билан талон-торож қилиш; 
168,моддаси — Фирибгарлик; 
184 моддаси — Солиқлар ёки йиғимларни тўлашдан бўйин товлаш; 
185-2 моддаси — Электр, иссиқлик энергияси, газ, водопроводдан фойдаланиш қоидаларини бузиш; 
189 моддаси — Савдо ёки хизмат кўрсатиш қоидаларини бузиш; 
205 моддаси — Ҳокимият ёки мансаб ваколатини суиистеъмол қилиш; 
206 моддаси — Ҳокимият ёки мансаб ваколати доирасидан четга чиқиш; 
28,209 моддаси — Жиноят иштирокчиларининг турлари, Мансаб сохтакорлиги; 
209 моддаси — Мансаб сохтакорлиги; 
211 моддаси — Пора бериш; 
228 моддаси — Ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш; 
243-моддаси — Жиноий фаолиятдан олинган даромадларни легаллаштириш бўйича назарда тутилган жиноятларни содир этганликда айбланмоқда. 

Маълум бўлишича, 29 нафар судланувчига нисбатан “қамоққа олиш”, 15 нафарига “гаров“ ва 6 нафарига "муносиб хулқ-атворда бўлиш ҳақидаги тилхат" тарзидаги эҳтиёт чоралари қўлланилмоқда.