Ўзбекистоннинг давлат қарзи 46,85 млрд долларни ташкил этди

2025 йил якунига кўра, Ўзбекистоннинг жами давлат қарзи (ташқи ва ички) 46,85 млрд долларни ташкил қилди. Бу ялпи ички маҳсулот (ЯИМ)нинг 31,9 фоизига тенг.

Таҳлилларга кўра, ташқи қарзнинг 83 фоизи хорижий валютада жалб қилинган. Қарз мажбуриятларининг 40 фоизи ўзгарувчан фоиз ставкаларига эга. Шунингдек, қарз портфелининг асосий қисми узоқ муддатли бўлиб, қисқа муддатли мажбуриятлар деярли мавжуд эмас.

Давлат қарзининг қолган қисми — 7,03 млрд доллари ёки 15 фоизи ички қарзга тўғри келади. Ички қарзнинг ЯИМга нисбати эса 4,8 фоизни ташкил этган.

Эслатиб ўтамиз, амалдаги қонунчиликка мувофиқ, давлат қарзининг ЯИМга нисбати 60 фоиздан ошмаслиги лозим. Ҳозирги қарз даражаси — қарийб 32 фоиз — халқаро мезонлар бўйича хавфсиз кўрсаткич сифатида баҳоланмоқда.