2021-yilgi Kobul aeroportidagi teraktga aloqador afg‘onistonlik sudlandi

Chorshanba kuni Virjiniya shtatidagi federal hakamlar hay’ati afg‘onistonlik shaxsni 2021-yilda Kobul aeroportida sodir etilgan xudkushlik hujumiga aloqadorlikda hamda terrorchilik tashkilotiga moddiy yordam ko‘rsatish uchun til biriktirganlikda aybdor deb topdi.

Biroq hakamlar hay’ati uning harakatlari bevosita o‘limlarga sabab bo‘lgan-bo‘lmagani borasida bir to‘xtamga kela olmadi va bu noaniqlik ayblanuvchi Muhammad Sharifullohni ehtimoliy umrbod qamoq jazosidan saqlab qoldi. U 20 yilgacha ozodlikdan mahrum etilishi mumkin.

AQSh okrug sudyasi Entoni Trenga hozircha hukm o‘qiladigan sanani belgilamadi. Hujum 2021-yil 26-avgust kuni, AQSh kuchlari Afg‘onistondan evakuatsiya qilinayotgan paytda sodir bo‘lgan edi.

“Abbey Gate” darvozasi oldida xudkush terrorchi portlovchi moddalar o‘rnatilgan kamzulini ishga tushirishi oqibatida 11 nafar dengiz piyodasi, bir nafar harbiy-dengiz kuchlari sanitari va bir nafar armiya askari, shuningdek, 160 nafarga yaqin afg‘onistonlik halok bo‘ldi.

Prokurorlarning ta’kidlashicha, Sharifulloh “Islomiy davlat” guruhining Afg‘onistondagi bo‘linmasi bo‘lgan “ISHID-Xuroson”ga hujum oldidan razvedka ma’lumotlarini to‘plash va aloqa o‘rnatishga ko‘maklashish orqali yordam bergan.

Himoyachilar fikricha, hukumat Federal Qidiruv Byurosi (FQB)  tergovlari chog‘ida Sharifulloh bergan ko‘rsatmalargagina suyanib qolgan va uning portlashdagi ishtirokini mustaqil ravishda isbotlay olmagan.

Ushbu ish “Abbey Gate” hujumi bilan bog‘liq AQSHdagi birinchi jinoiy sud jarayonidir.

Donald Trampning ikkinchi muddati boshida Sharifulloh Pokistonda, Afg‘oniston chegarasi yaqinida, FQB va Markaziy razvedka bilan hamkorlik qilayotgan Pokiston xavfsizlik kuchlari tomonidan qo‘lga olindi.