«Йилнинг энг яхши деворий сурати – 2025» мукофоти Мария Калласнинг Грециядаги тасвирига берилди

"Новдалар, қушлар ва мевалар орасида тасвирланган Мария Каллас сиймоси инсоният ва табиат ўртасидаги алоқани ифодалайди" дея таъриф берилган фрескага.

Асар муаллифи Клеоменис Костопулоснинг айтишича, у суратни икки ҳафтада чизиб тугатишни режалаштирган, аммо об-ҳаво ноқулайлиги сабабли иш бир ойга чўзилган. Рассом фрескани ишлаш учун махсус мўйқаламлар, бўёқ баллонлари ва кўтариш кранидан фойдаланган.

«Мария Калласнинг отаси Месиния (Греция) минтақасидан бўлиб, айнан шу нарса уни Каламата тимсоли сифатида тасвирлашга туртки бўлди. Фреска аслида «Мария Каллас» эмас, «Каламата» деб номланган, ниятим шаҳарни аллегорик тасвирлаш эди», – дейди Клеоменис Костопулос.

Рассом опера юлдузининг шахсиятидан ташқари, унинг кийимига ҳам алоҳида эътибор қаратган. Унинг сўзларига кўра, суратдаги либос – Месиния минтақасининг табиий мўл-кўл бойликлари рамзидир. Шунингдек, фреска Каламатанинг 2030 йилга келиб иқлим нейтрал шаҳар бўлиш мақсади билан боғланган.

Мутахассислар фикрича, фрескалар чиқиндиларни камайтириб бермаса-да, инсонларни ўз хатти-ҳаракатларини ўзгартиришга чорлаб, кундалик ҳаётда экологик меъёрларга риоя этишга ундайди.

Маҳаллий ҳокимият янги деворий тасвирнинг сайёҳлик йўналишини ривожлантиришдаги ролини олқишлади. Ҳокимият вакилининг айтишича, фреска аллақачон диққатга сазовор марказга айланган: одамлар унинг фонида расмга тушишяпти, фрескани кўриш учун Каламатага келишмоқда ва ижтимоий тармоқларда реклама қилишмоқда.

Клеоменис Костопулос Street Art Cities мукофотидан мамнун эканлигини билдириб, бир нечта шаҳар ҳокимликлари ва бошқа ташкилотлар унга ҳамкорлик бўйича алоқага чиққанини айтди. 

Муаллиф: Исомиддин Жуманазаров