Энди Россия чегарасида мобил қурилмалар текширилади

Россияда “Россия Федерацияси давлат чегараси тўғрисида”ги қонунга киритилган ўзгартиришлар кучга кирди. Янги тартибга кўра, чегара хизмати ходимлари мамлакат чегарасини кесиб ўтиш вақтида мобил телефонлар, планшетлар ва ноутбукларни кўздан кечириш ҳуқуқига эга бўлди.

Маълум қилинишича, чегарачилар қурилмалардаги маълумотларни текшириши ва давлат чегараси режими бузилгани ёки тақиқланган материаллар борлигига шубҳа бўлса, қурилмани тақдим этишни талаб қилиши мумкин.

Россия Федерацияси Федерал хавфсизлик хизмати маълумотига кўра, қурилмани текшириш учун беришдан бош тортиш мансабдор шахс талабига бўйсунмаслик сифатида баҳоланади.

Бу ҳолатда Россия Федерацияси Маъмурий жавобгарлик тўғрисидаги кодекси асосида 5 000дан 7 000 рублгача жарима ёки 15 суткагача маъмурий қамоқ жазоси қўлланилиши мумкин.

Шунингдек, чегара назорати пайтида террористик ёки экстремистик ташкилотлар, шу жумладан радикал каналларга обуна бўлган шахслар Россияга киритилмаслиги мумкин. 

Бундай ҳолатлар аввал Тожикистон ва Ўзбекистон фуқаролари билан боғлиқ ҳолатларда кузатилган.