Давлат рамзлари тўғрисидаги қонунни бузган фуқарога жарима тайинланди

Тошкент шаҳрида суд Фарғона вилоятида туғилган 21 ёшли аёлни давлат рамзлари тўғрисидаги қонунчиликни бузгани учун маъмурий жавобгарликка тортди.

Иш материалларига кўра, 2004 йилда туғилган фуқаро Ш. 2025 йил 28 октябрь куни Филиппиннинг Манила шаҳрида бўлиб ўтган «Miss Earth — 2025» халқаро гўзаллик танловида иштирок этган. Танлов давомида у Ўзбекистон Республикасининг давлат байроғи ва герби тасвирлари туширилган либосда саҳнага чиққан, шунингдек мазкур образдаги фотосуратни ижтимоий тармоқда жойлаштирган.

Суд мажлисида айбланувчи айбини қисман тан олган. Унинг сўзларига кўра, костюм миллий рамзлардан илҳомланиб тайёрланган. Шу билан бирга, у либосда давлат байроғининг ажралмас қисми ҳисобланган яримой ва 12 юлдуз тасвирлари мавжуд бўлмаганини таъкидлаган.

Мирабод тумани жиноят ишлари бўйича судининг 2026 йил 19 январдаги қарори билан фуқаро Маъмурий жавобгарлик тўғрисидаги кодекснинг 203-1-моддаси 1-қисми (давлат рамзлари тўғрисидаги қонунчиликни бузиш) асосида айбдор деб топилди.

Суд қарорига мувофиқ, унга икки базавий ҳисоблаш миқдорида — 824 минг сўм жарима тайинланди.