Келгуси 10 йилда 450 млрд долларлик энергетика лойиҳалари амалга оширилади

Ўзбекистонда келгуси ўн йилда ҳамкорлар билан қуёш ва шамол электр станциялари ҳамда энергия сақлаш қувватларини барпо этиш бўйича 450 млрд долларлик лойиҳаларни амалга ошириш мақсад қилинган. Бу ҳақда Президент Шавкат Мирзиёевнинг электротехника саноати вакиллари, тадбиркорлар ҳамда инвесторлар билан мулоқотида маълум қилинди.

Учрашувда электротехника саноати учун асосий хомашёлардан бири бўлган мис ишлаб чиқаришни кўпайтириш масаласига алоҳида эътибор қаратилди. Жорий йилда учинчи мис бойитиш фабрикаси ишга туширилди. Ушбу лойиҳа ҳисобига мис ишлаб чиқариш ҳажми 300 минг тоннага, 2030 йилга бориб эса 500 минг тоннага етказилади.

Мамлакатда қуёш ва шамол электр станциялари, энергия сақлаш қувватлари барпо этилмоқда. Шунингдек, ҳудудларда кенг кўламли қурилиш ишлари олиб борилмоқда. Бу электротехника маҳсулотлари учун катта ва узоқ муддатли бозор яратади.

Давлат раҳбари электротехника саноатидаги навбатдаги вазифа ишлаб чиқариш қувватларини ошириш билангина чекланмасдан, катта технологик сакрашни амалга ошириш эканини таъкидлади.

Жумладан, 2030 йилгача энергия сақлаш қувватларини 4,5 гигаваттга етказиш режалаштирилган. Хорижий ҳамкорлар ушбу лойиҳаларда маҳаллий маҳсулотлардан фойдаланишга тайёр, бироқ зарур айрим ускуналар ҳозирча Ўзбекистонда ишлаб чиқарилмаяпти.

Учрашувда видеокузатув ускуналари ишлаб чиқариш имкониятлари ҳам муҳокама қилинди. Савдо мажмуалари, корхоналар, уй-жойлар ва кўчаларда бундай ускуналарга талаб ортиб бормоқда. Ушбу маҳсулотларнинг ички бозордаги йиллик эҳтиёжи 200 млн долларни, қўшни мамлакатлар бозори билан бирга ҳисоблаганда эса 600 млн доллардан ошади.

Бухородаги «Digital security» ва Самарқанддаги «Samvision» корхоналари ўз дастурий таъминоти асосида йилига 2 мингта камера ишлаб чиқармоқда. Бундай лойиҳалар сонини кўпайтириш зарурлиги кўрсатиб ўтилди.

Президент мис ва муҳим минераллар захиралари, салоҳиятли ёшлар, тажрибали тадбиркорлар ҳамда ҳамкорликка тайёр инвесторлар имкониятларини янги технологиялар ва ишланмалар билан бирлаштириш муҳимлигини қайд этди.