Лицензиясиз фаолият юритаётган клиникалар аниқланди

Маълумотларга кўра, жорий йилнинг 6 октябрь куни президентнинг “Истеъмолчилар ҳуқуқларини самарали ҳимоя қилишни ташкил этиш чора-тадбирлари тўғрисида”ги ПҚ–296-сон қарори қабул қилинган бўлиб, унда фуқаролар ҳуқуқларини ҳимоя қилиш тизимини такомиллаштириш, давлат ва нодавлат ташкилотлар ўртасида самарали ҳамкорликни йўлга қўйиш ҳамда жамоатчилик назоратини кучайтириш вазифалари белгиланган.

Шу асосда Рақобат қўмитаси нодавлат нотижорат ташкилотлар билан ҳамкорликда хусусий тиббиёт муассасаларида истеъмолчилар ҳуқуқларига риоя этилишини ўрганди. Текширувлар жами 7 284 та хусусий тиббиёт ташкилотини қамраб олди, бу умумий сонинг 85 фоизини ташкил этади.

Ўрганиш натижасида қуйидаги ҳолатлар аниқланган:

27,4 фоиз клиникалар (2000 та) кўрсатилган манзилда фаолият юритмаяпти;

3 фоизида (235 та) пешлавҳалар мавжуд эмас;

47 фоизида (3 428 та) ташқи реклама объектлари жойлаштирилган;

20 фоизида (1 460 та) ахборотлар давлат тилида берилмаган;

61,5 фоизида (4 483 та) хизмат нархномалари кўрсатилмаган.

Бундан ташқари, айрим клиникалар лицензияда кўрсатилмаган фаолият турлари билан шуғулланаётгани аниқланди.

Жумладан:

Самарқанд вилоятида — 1 та;

Сурхондарё вилоятида — 2 та;

Тошкент вилоятида — 5 та;

Фарғона вилоятида — 2 та клиника шундай ҳолатда фаолият юритгани маълум бўлди.

Аниқланган ҳолатлар бўйича материаллар белгиланган тартибда мутасадди идораларга юборилди.

Рақобат қўмитаси нодавлат нотижорат ташкилотлар фаолиятини қўллаб-қувватлаш, жамоатчилик назоратини кучайтириш ҳамда истеъмолчилар ҳуқуқларини ҳимоя қилиш бўйича ишлар изчил давом эттирилишини маълум қилди.