Шаҳноза Мирзиёеванинг мушуги йўқолиб-топилди

У 11 октябрь куни мушуги Қорасув-1 (собиқ Луначарский) ҳудудида йўқолганини эълон қилган эди. Шаҳноза Мирзиёева фуқароларга мурожаат қилиб, уни топишда ёрдам сўради, мушук оила билан йиллар давомида бирга яшаган ва айниқса болалар учун жуда қадрли бўлганини таъкидлади. Оила бутун маҳаллани айланиб чиққан ва эълонлар ёпиштирган, лекин ҳеч қандай натижа бўлмаган. Шундан сўнг Мирзиёева Instagram-саҳифаси орқали эълон берди. 

Мазкур эълон Интернетнинг ўзбек сегментида қизғин муҳокамаларга, айрим ҳолларда ҳазил-мутойибаларга сабаб бўлди. Орадан кўп ўтмай мушук топилгани эълон қилинди.
“Мушугимиз топилди. У энди уйда ва мен ниҳоят хотиржам бўлдим”, дея ёзди Мирзиёева. Унинг қўшимча қилишича, мушук 11 октябрдан бери тинимсиз излаб чиқилган. 

“Мўжиза рўй берди. Ўзбекистоннинг барча бефарқ бўлмаган фуқароларига чин қалбимдан миннатдорлик билдираман. Атрофимизда шунчалик яхшилик, меҳр ва инсонийлик борлигини ҳис қилдим! Сизлар эълонни тарқатиб, илиқ сўзлар билан қўллаб-қувватладингиз, ижтимоий тармоқларда бўлишдингиз, қўнғироқ қилдингиз ва ёрдам қўлини чўздингиз. Ҳар бир хабар, ҳар бир репост аҳамиятсиз қолмади. Сизнинг меҳр ва ғамхўрлигингиз туфайли севимли мушугимиз яна уйимизда”, дея хурсандчилик билан пост қолдирган Мирзиёева. 

Таъкидланишича, мушук излаш ортидан кўплаб яхши инсонлар бирлашган, ёрдам қўлини чўзган. 

“Бундай дамларда атрофимизда қанчадан-қанча меҳрибон ва самимий инсонлар борлигини яна бир бор ҳис этдим. Ҳаммангизга катта раҳмат. Кичик дўстларингизни асранг. Биз уларни қўлга ўргатганмиз ва улар учун жавобгармиз”, дея ўз постини якунлаган Шаҳноза Мирзиёева.