ССВ тизимида 1000 дан ортиқ манфаатлар тўқнашуви ҳолатлари аниқланди

Бу ҳақда Коррупцияга қарши курашиш агентлиги маълум қилди.

Маълумотларга кўра, ҳолатлар қуйидаги муассасаларда қайд этилган:

• 134 та — ихтисослаштирилган илмий-амалий тиббиёт марказлари ва республика муассасаларида;

• 347 та — ҳудудий соғлиқни сақлаш бошқармалари ҳамда туман (шаҳар) тиббиёт бўлимларида;

• 796 та — бошқа тиббиёт муассасалари ва вазирлик тизими ташкилотларида.

Масалан, Вирусология илмий текшириш институти молия-иқтисод бўлими бошлиғи Н.А. ҳамда Андижон вилояти соғлиқни сақлаш бошқармасининг бош ҳисобчиси Г.Г. ўз бўйсунувидаги қариндошлари билан биргаликда ишлагани аниқланган.

Шунингдек, Улуғнор тумани тиббиёт бирлашмаси бош ҳисобчиси А.М. ўз лавозимидан фойдаланиб, яқин қариндошларини ҳамшира ва лаборант вазифаларига ишга жойлаштирган.

Агентлик маълумотича, бундай ҳолатларга йўл қўйган ходимлар билан меҳнат шартномалари бекор қилинган ёки улар ротация қилинган.

Қўшимча равишда, вазирликнинг Коррупцияга қарши ички назорат бўлими олиб борган текширувлар натижасида соҳадаги 567 та қонунбузилиш ҳолати ўз вақтида бартараф этилган.