Тошкентда маст ҳолатда операция қилган сохта жарроҳларга ҳукм ўқилди

Тошкент шаҳри Чилонзор туман судида ноқонуний равишда пластик жарроҳлик амалиётларини ўтказиб, фуқаролар соғлиғига оғир зарар етказган эр-хотинга нисбатан суд ҳукми эълон қилинди.

Маълум бўлишича, судланувчилар тиббий маълумотга эга бўлмаган ҳолда (эркак фақат мактабни тугатган) кўп қаватли уйнинг ертўласида ташкил этилган ноқонуний клиникада мураккаб косметологик ва жарроҳлик амалиётларини амалга ошириб келган. Натижада бир неча аёллар оғир тан жароҳати олган, юз соҳасида деформация кузатилган, айрим ҳолатларда жабрланувчилар кома ҳолатига тушган.

Жабрланувчилардан бирининг кўрсатмасига кўра, операция маст ҳолатда бўлган эркак томонидан ўтказилган. Амалиётдан сўнг аёл беш кун давомида комада бўлган, унинг юз нервлари шикастланиб, юзининг бир қисми фалаж бўлиб қолган.

Яна бир жабрланувчи суд мажлисига ногиронлик аравасида келган. Унинг айтишича, сохта косметологлар хатосини тан олиб, тўланган маблағнинг бир қисмини (600 доллар) қайтарган, аммо етказилган зарар қайтариб бўлмас даражада бўлган.

Мутахассислар хулосасига кўра, амалиётлар вақтида энг арзон ва сифатсиз тиббий материаллар қўлланган.

Тергов жараёнида маълум бўлишича, судланувчи аёл бир неча бор исм-фамилиясини ўзгартирган, сохта дипломлардан фойдаланган ҳамда бошқаларга пул эвазига “таълим бериб”, сертификатлар тарқатган. Вақтиналик фаолияти тўхтатилганига қарамай, у яширин равишда 200–400 доллар эвазига мижоз қабул қилишни давом эттирган.

Пластик жарроҳ Саид Аҳмедшиннинг таъкидлашича, косметолог фақат тери юзасидаги муолажаларни бажариши мумкин, ички тўқималар, қон томирлари ва нервлар билан ишлаш эса фақат лицензияга эга профессионал жарроҳлар ваколатига киради.

Суд ҳукмига кўра, эркак Ўзбекистон Республикаси Жиноят кодексининг 186-моддаси (хавфсизлик талабларига жавоб бермайдиган хизматлар кўрсатиш) билан айбдор деб топилиб, 3 йил муддатга озодликдан маҳрум этилди ва суд залидан ҳибсга олинди.

Аёл кишига нисбатан, қаромоғида икки ойлик чақалоғи борлиги инобатга олиниб, 3 йил муддатга озодликни чеклаш жазоси тайинланди.