Тошкентда йўл ҳаракатини бошқариш бўйича янги марказ иш бошлайди

Бу Президентнинг «Тошкент шаҳрида транспорт тизими бошқарувини такомиллаштириш ҳамда тирбандликларнинг олдини олишга қаратилган қўшимча чора-тадбирлар тўғрисида»ги қарорида белгиланди.

Марказнинг асосий ваколатлари

Қарорга кўра, марказ қуйидаги манбалардан маълумот олиш ҳуқуқига эга бўлади:

— вазирликлар ва идоралар,
— Тошкент шаҳри ва вилояти ҳокимликлари,
— йўловчи ташувчи корхоналар,
— электромобил қувватлаш станциялари,
— тўхташ жойлари операторлари,
— микромобил воситалари ижараси хизматлари,
— бошқарувчи компаниялар ва бошқа муассасалар.

Марказга қўшимча равишда:

— айрим йўл участкаларида ҳаракат тезлиги режимини белгилаш,
— айрим транспорт турларининг, жумладан юк машиналарининг ҳаракатига чеклов ўрнатиш,
— фото ва видео қайд этиш воситалари орқали аниқланадиган қоидабузарликлар рўйхатини шакллантириш, уларга жарималар бўйича таклифлар киритиш,

ваколатлари берилади.

Интизомий жавобгарлик бўйича таклиф киритиш ҳуқуқи

Агар шаҳар йўл ҳаракати билан боғлиқ вазифалар лозим даражада бажарилмаса, марказ тегишли ташкилотлар раҳбарларига масъул ходимларни интизомий жавобгарликка тортиш тўғрисида таклиф бериш имкониятига эга бўлади.

Ваколатлар ўтказилиши

2026 йил 1 июлдан бошлаб Тошкент шаҳар ҳокимлиги, Транспорт вазирлиги ва ИИВнинг айрим ваколатлари янги марказга ўтказилади.
Марказ ушбу ваколатлардан 2028-йил 31-декабрга қадар ҳуқуқий эксперимент доирасида фойдаланади.

Шаҳар транспортига оид йирик лойиҳалар

Президент қарорида, шунингдек, пойтахт инфратузилмасини кенгайтиришга доир қуйидаги режалар белгиланган:

— Хитой банкдан 271 млн доллар кредит жалб қилинади — йўлларни реконструкция қилиш ва янги чорраҳалар қуриш учун,
— 2030 йилгача 150 минг ўринли тўхташ жойлари барпо этилади,
— Тошкент метрополитени узунлиги 103 километрга етказилади,
— пиёдалар ва велосипед йўлаклари кенгайтирилади.