Тунда гулдаста олиб келган нотаниш эркак Ризаева уйига кирмоқчи бўлди

12 ноябрь куни кечқурун машҳур хонанда Муниса Ризаеванинг синглиси — Карима Ризаеванинг уйига қўлида гулдаста кўтариб келган номаълум эркак милиция томонидан ҳибсга олинди. Кариманинг айтишича, эркак гулларни шахсан топширишга қатъият билан уринган, аммо у эшикни очмаган ва воқеани кузатув камераси орқали қайд этган.

Ризаеванинг таъкидлашича, уйда хавфсизлик тугмаси мавжуд бўлиб, у босилгандан сўнг икки дақиқа ичида навбатчи милиция гуруҳи етиб келган. Тезкор гуруҳ номаълум шахсни ҳибсга олган ва кейинчалик унинг аввал гиёҳванд моддалар, босқинчилик ва ўғрилик каби жиноятлар учун жавобгарликка тортилгани аниқланган.

Карима Ризаева содир бўлган ҳолат юзасидан шундай деди:

“Бу эътибор белгиси эмас, балки шахсий хавфсизликка таҳдид. Одамнинг уйига огоҳлантирмасдан, айниқса, тун вақтда келиш мумкин эмас.”