Хорижий тил ўқитувчилари нега иш жойини йўқотяпти?

 Бу ҳолатлар юзасидан Давлат меҳнат инспекцияси расмий муносабат билдирди.

Таълим соҳасида баҳсли вазият

Маълумотларга кўра, инспекцияга келиб тушаётган мурожаатларнинг катта қисми тил сертификатига эга бўлмаган ўқитувчилар билан боғлиқ. Айрим таълим муассасалари раҳбарияти мазкур асосда меҳнат муносабатларини тўхтатишга уриниб, қонун талабларини четлаб ўтаётгани айтилмоқда.

Давлат меҳнат инспекцияси бундай ҳаракатлар меҳнат қонунчилигига зид эканини таъкидлаб, ҳар бир ҳолат алоҳида ўрганилиб, айбдорларга нисбатан белгиланган тартибда чора кўрилишини билдирди.

Инспекция, шунингдек, ўз ҳуқуқлари бузилган деб ҳисоблаган ўқитувчиларни расмий мурожаат қилишга чақирди.

Сертификат талаби қаердан келган?

Эслатиб ўтамиз, хорижий тил ўқитувчилари учун камида B2 даражадаги миллий ёки халқаро тил сертификатига эга бўлиш талаби 2021 йилда қабул қилинган Вазирлар Маҳкамаси қарори асосида жорий этилган.

Дастлаб ушбу талаб 2024 йилга қадар бажарилиши керак эди. Бироқ ўқитувчиларнинг барчаси белгиланган муддатда сертификат ололмагани сабабли, уни жорий этиш бир неча бор кечиктирилди.

Охирги қарорга мувофиқ, сертификатга эга бўлмаган ўқитувчиларга 2026 йил 1 январга қадар фаолият юритишга рухсат берилган.

Вазирлик ва касаба уюшмалари позицияси

2025 йил ёзида Ўзбекистон таълим ва фан ходимлари касаба уюшмалари республика кенгаши тегишли вазирликка мурожаат қилиб, сертификатга эга бўлмаган хорижий тил ўқитувчиларини ишдан бўшатмасликни сўраган.

Мактабгача ва мактаб таълими вазирлиги эса ўз жавобида таълим муассасаларига бундай ўқитувчилар билан меҳнат шартномаларини бекор қилиш бўйича расмий кўрсатма берилмаганини маълум қилган.