Яна 3 та туманга янги ҳоким тайинланди

Қораўзак тумани 

Анвар Баймуратов Қорақалпоғистон Республикаси Қораўзак туманига ҳоким этиб тайинланди. 

Анвар Баймуратов 1983 йил 11 июлда Республиканинг Нукус шаҳрида туғилган. 2020 йилдан бугунга қадар Қораўзак тумани ҳокимининг ўринбосари — сармоялар ва ташқи савдо бўлими бошлиғи лавозимида ишлаб келаётганди. 

Шунингдек, у Савдо-саноат палатаси Қорақалпоғистон Республикаси бошқармаси, Қорақалпоғистон Хусусийлаштирилган корхоналарга кўмаклашиш ва рақобатни ривожлантириш қўмитаси, Қорақалпоғистон Инвестициялар ва ташқи савдо вазирлигида маъсумиятли лавозимларда фаолият олиб борган. 

Гурлан тумани 

Ўразбаев Руслан Хажибаевич Хоразм вилояти Гурлан тумани ҳокими лавозимига тайинланди. 

Ўразбаев 1979 йилда Хоразм вилоятида  туғилган, 2000 йилда Тошкент ирригация ва қишлоқ хўжалигини механизациялаш муҳандислари институтини тамомлаган. 

Бундан олдин, у Ўзбекистон Республикаси Иқтисодиёт ва молия вазирлиги ҳузуридаги Кадастр агентлигининг Хоразм вилояти бошқармаси бошлиғи  лавозимида ишлаган. Руслан Хажибаевич ҳокимликка Президент ҳузуридаги Давлат хизматини ривожлантириш агентлигининг Миллий кадрлар захирасидан тавсия этилган. 

Янгиариқ тумани 

Матназаров Зафарбек Баҳадирович Хоразм вилояти Янгиариқ туманига ҳоким вазифасига тайинланди. 

Матназаров 1986 йилда Хорамда туғилган, маълумоти олий, Тошкент молия институтини тамомлаган. Тайинловга қадар Қўшкўпир тумани ҳокимининг молия-иқтисодиёт ва камбағалликни қисқартириш масалалари  бўйича биринчи ўринбосари — туман иқтисодий тараққиёт ва камбағалликни қисқартириш бўлими бошлиғи лавозимида ишлаган. 

Зафарбек Баҳадирович ҳам ҳокимликка Президент ҳузуридаги Давлат хизматини ривожлантириш агентлигининг Миллий кадрлар захирасидан тавсия этилган. 

Эслатиб ўтамиз, бундан аввал Тахиатош, Мингбулоқ, Фурқат ҳамда Тошкент туманига янги ҳокимлар тайинланганди.