Тошкентда янги ер ости йўлининг девори ўпирилиб тушди

Тошкент шаҳар ҳокими Шавкат Умурзаков воқеа жойига бориб, ишчи гуруҳ ва мутасадди хизматлар раҳбарлари билан биргаликда ҳудудни кўздан кечирди. У юзага келган вазиятни ўрганиб, масъулларга ҳодиса оқибатларини тезкор бартараф этиш ҳамда ҳудуддаги ишлар устидан назоратни кучайтириш бўйича топшириқлар берди.

Тошкент шаҳар ҳокимлиги маълумотига кўра, йўл ўтказгичнинг ўпирилиб тушишига кучли ёмғир сабаб бўлган. Ҳодиса оқибатида жабрланганлар йўқ. Шу билан бирга, қурилиш-монтаж ишлари сифати бўйича қоидабузарликлар аниқланса, масъулларга нисбатан чора кўрилиши айтилган.

Маълумотларга кўра, ушбу йўл ўтказгич қурилишига 128,6 миллиард сўм сарфланган. У 2024 йил август ойида фойдаланишга топширилган эди. Лойиҳа тақдимотида бу технология мамлакатда илк бор қўлланилгани, қурилиш муддати бошқа кўприкларга нисбатан икки баробар кам вақт талаб қилиши ҳамда хизмат қилиш муддати 100 йилдан ортиқ бўлиши таъкидланган.

Айни пайтда йўлнинг иккинчи қисмида ҳам жиддий ёриқлар пайдо бўлгани айтилмоқда. Мутахассислар дастлабки баҳолашда қурилиш жараёнида айрим камчиликлар бўлиши мумкинлигини истисно этмаяпти. Бироқ ҳозирча объектни қайси пудратчи компания қургани расман очиқланмаган.