Қурувчиларнинг маккарона шартномалари фош этилди

Рақобат қўмитаси текширувлари айрим қурилиш компаниялари тузаётган шартномалар харидорлар манфаатларини ҳимоя қилмаётганини кўрсатди. Қўмита маълумотига кўра, бу каби шартномалар асосан қурувчилар фойдасига хизмат қилган.

Қарийб 130 та қурувчи–истеъмолчи шартномаси экспертизадан ўтказилиб, уларнинг аксариятида қонун талабларига зид ва истеъмолчи ҳуқуқларини чекловчи бандлар мавжуд экани маълум бўлди.

Аниқланишича, кўп ҳолатларда шартномаларга уйни ўз вақтида топширмаганлик учун пеня, кафолат муддати ҳамда нуқсонларни бартараф этиш мажбуриятлари киритилмаган. Шу билан бирга, харидор шартномани бекор қилган тақдирда, тўланган маблағни қайтариш муддати асоссиз равишда 30 кундан 3 йилгача этиб белгиланган.

Айрим ҳолатларда эса шартномаларни тўғридан-тўғри қурувчи компания эмас, балки “агент” ёки “тижорат вакили” сифатида бошқа шахслар имзолаган. Бу эса муаммо келиб чиққан тақдирда ҳақиқий қурувчининг жавобгарликдан қочишига олиб келган.

Ушбу қоидабузарликлар ва сифатсиз қурилишлар бўйича келиб тушган 1 700 дан ортиқ мурожаат асосида Рақобат қўмитаси қурувчилардан 22,1 миллиард сўм маблағни фуқаролар фойдасига қайта ҳисоб-китоб қилдирди. Шунингдек, рухсат ҳужжатларисиз уй-жойларни реклама қилган компанияларга нисбатан молиявий жарималар қўлланилди.

Рақобат қўмитаси фуқароларни уй харид қилишдан олдин шартномани малакали ҳуқуқшунос билан кўриб чиқишга ҳамда қурувчи ҳақидаги маълумотларни “Шаффоф қурилиш” тизими орқали текширишга чақирди.