Тошкент ҳокимлиги ходимлари учун қимор ва қиммат совғалар тақиқланди

Ҳужжатга мувофиқ, эндиликда ходимларга қимор ва таваккалчиликка асосланган ўйинларда иштирок этиш, қимматбаҳо совғалар қабул қилиш, маишатбозлик ва дабдабали ҳаёт тарзини тарғиб қилиш тақиқланади. Шунингдек, хизмат автомобилларидан шахсий мақсадларда фойдаланиш ҳам ман этилади.

Қоидаларда ижтимоий тармоқлардаги фаолиятга ҳам алоҳида эътибор қаратилган. Ходимларга давлат органлари ва мансабдорлар фаолиятини муҳокама қилиш, ҳақоратли ёки ахлоққа зид фикрлар билдириш, шунингдек, ислоҳотларга нисбатан ишончсизлик уйғотувчи материалларни тарқатиш мумкин эмаслиги белгиланди.

Бундан ташқари, давлат хизматчиларига коррупцияга қарши муросасиз муносабатда бўлиш, манфаатлар тўқнашувига йўл қўймаслик, хизмат сирларини сақлаш ва фуқаролар билан хушмуомалада бўлиш мажбурияти юклатилди.

Янги қоидаларга кўра, раҳбарлар ҳам жамоада соғлом муҳит яратиш, маҳаллийчилик ва таниш-билишчиликка йўл қўймаслик, ходимларга нисбатан ҳақорат ва камситиш ҳолатларига барҳам бериш учун шахсан жавобгар ҳисобланади.

Ҳужжатда қайд этилишича, одоб-ахлоқ қоидаларига риоя қилиниши ходимларнинг хизмат фаолиятини баҳолашда муҳим мезонлардан бири бўлади. Қоидаларни бузган шахсларга нисбатан интизомий чоралар қўлланиши мумкин.