Буюк Британия Абрамович устидан 2,5 миллиард фунт маблағ юзасидан судга мурожаат қилишга тайёр

Буюк Британия ҳукумати футбол клуби "Челси"ни сотишдан тушган 2,5 миллиард фунт стерлингни блокдан чиқариш мақсадида Роман Абрамович устидан судга мурожаат қилишга тайёр эканини маълум қилди. Бу ҳақда "Deutsche Welle" нашри хабар қилди.

Спорт

03.06.2025, 11:36

На русском языке

Улашиш:

Фото: Clive Mason / Getty Images

Клубга деярли 19 йил эгалик қилган россиялик миллиардер 2022 йилда Россиянинг Укранага бостириб кириши бошлангандан сўнг "Челси"ни сотишга қарор қилган эди. Ўшанда у савдодан тушган маблағларни "Украинадаги уруш қурбонлари манфаатлари йўлида” хайрия фондига йўналтиришини ваъда берган.

Бироқ орадан кўп ўтмай, Буюк Британия Абрамович ва унинг активларига қарши санкциялар жорий қилди. Клуб савдоси амалга оширилган бўлса-да, тушган маблағ махсус ҳисоб рақамида музлатиб қўйилди. Ушбу маблағлардан фойдаланиш учун Буюк Британиянинг Молиявий санкцияларни қўллаш бошқармасидан (OFSI) махсус лицензия талаб этилади. Бу лицензия фақат зарур хайрия фонди ташкил этилгач берилади.

Абрамович маблағлар можародан зарар кўрган барча томонларга, жумладан россиялик фуқароларга ҳам ёрдам кўрсатишга йўналтирилишини талаб қилмоқда. Британия ҳукумати эса, аксинча, бу маблағлар фақат Украинадаги инсонпарварлик эҳтиёжлари учун ишлатилишини талаб қилмоқда.

"Биз жаноб Абрамович билан бу масалада ҳалигача келишувга эришилмаганидан чуқур афсусдамиз", — дея келтиради The Guardian молия вазири Рейчел Ривз ва Ташқи ишлар вазири Дэвид Лэмми томонидан берилган қўшма баёнотни.

Ҳужжатда қайд этилишича, Буюк Британия ҳукумати "Челси" клуби савдосидан тушган маблағлар Украинадаги инсонпарварлик мақсадларига йўналтирилишини қатъий қўллаб-қувватлайди ва бу борада зарур бўлса, суд тартибида даъво қилишга тайёр.

Спорт

03.06.2025, 11:36

Улашиш: