47 nafar fuqaroni chuv tushurgan firibgar ushlandi

Unda qayd etilishicha, Bosh prokuratura huzuridagi Departament Samarqand viloyati Oqdaryo tumani boʻlimi va IIB xodimlari hamkorligida tezkor tadbir oʻtkazgan. Fuqaro V.I. fuqarolar E.X. va B.B.ning ishonchiga kirib, ularni Angliya davlatiga ishga yuborishni vaʼda bergan. Buning evaziga 4500 AQSh dollarini olib, shundan 1,2 mln soʻm va 700 AQSh dollarini qaytarib bergan vaqtida ashyoviy dalillar bilan ushlangan.

Shuningdek, tergovga qadar tekshiruv davomida fuqaro V.I. 47 nafar fuqaroni ishonchiga kirib, chet davlatlarga ishga yuborishi evaziga jami 37 160 AQSh dollarini firibgarlik yoʻli bilan qoʻlga kiritganligi aniqlangan.

Bundan tashqari, departamentning Navoiy viloyati boshqarmasi, DXX va IIB xodimlari hamkorligida oʻtkazgan tezkor tadbirda fuqaro R.D. fuqaro A.F.ning ishonchiga kirib, uni Koreya davlatiga yashash va ishlash uchun joʻnatishi hamda viza hujjatlarini tayyorlab berishi evaziga 4 000 AQSh dollarini olgan vaqtida ashyoviy dalillar bilan ushlangan.

“Mazkur holatlar yuzasidan Jinoyat kodeksining 168-moddasi (firibgarlik) bilan jinoyat ishlari qoʻzgʻatilib, tergov harakatlari oʻtkazilmoqda”, deyiladi xabarda.

Eslatib oʻtamiz, avvalroq odamlarning “Amerika orzusi”ni amalga oshirmoqchi boʻlgan firibgarlar ushlangandi.