Oʻzbekistonda soxta raqamlar orqali qilinayotgan qoʻngʻiroqlar avtomatik bloklanadi

Mazkur tizim Raqamli texnologiyalar vazirligi tashabbusi bilan ishlab chiqilgan boʻlib, uning yordamida firibgarlik qoʻngʻiroqlariga qarshi samarali himoya taʼminlanadi.

Yangi tizim orqali, agar qoʻngʻiroq xorijdan amalga oshirilsa, ammo raqam mahalliy — masalan, +998 kodi bilan boshlansa, tizim bu nomutanosiblikni aniqlab, qoʻngʻiroqni avtomatik tarzda bloklaydi. Shu tariqa, firibgarlar xorijdan Oʻzbekiston abonenti sifatida koʻrinib, fuqarolarni aldash imkoniyatidan mahrum boʻladi.

“Anti-spoofing” xizmati abonentlar uchun bepul va avtomatik ravishda faollashtirilgan — foydalanuvchi tomonidan hech qanday qoʻshimcha harakat talab etilmaydi.

Mobiuz maʼlumotiga koʻra, tizim 2025 yil sentabridan faoliyat yuritmoqda va bir oy ichidayoq firibgarlardan kelgan minglab soxta qoʻngʻiroqlar abonentlarga yetmasdan bloklangan.