Toshkentda ijara toʻlovlarining pasayishi davom etmoqda

Markaziy bank 2025 yil II choragi uchun koʻchmas mulk bozori tahlilini eʼlon qildi.

Unda qayd etilishicha, joriy yilning II chorak yakunlariga koʻra, koʻchmas mulk bozoridagi faollik yuqoriligicha qoldi. Ushbu davrda koʻchmas mulk bozorida tuzilgan bitimlar soni 88,1 mingtani tashkil etib, oʻtgan yilning mos davriga nisbatan 9,9 foizga oshgan.

Markaziy bank hisobotida birinchi yarim yillikda koʻchmas mulk oldi-sotdisi bilan bogʻliq shartnomalar soni ham oʻsishda davom etib, 148,4 mingtani tashkil etdi. Bu oʻtgan yilga nisbatan 12,1 foizga koʻpdir.

Koʻchmas mulk bozoridagi faollikning oʻsishi ipoteka kreditlarining koʻpayishi, aholi daromadlari va uy-joy qurilishiga investitsiyalarning oʻsishi bilan izohlanadi.

Dastlabki olti oyda ipoteka kreditlaridan foydalangan holda tuzilgan bitimlarning oldi-sotdi bitimlarining umumiy hajmidagi ulushi 21,3 foizgacha oshdi, bu esa ipotekaning uy-joy sotib olishdagi roli ortib borayotganidan dalolat beradi.

II chorakda narxlar dinamikasi barqaror saqlanib qoldi. Talab yuqori boʻlishiga qaramay, taklif yetarli boʻlib qolmoqda, bu esa narxlarning tez oʻsishiga toʻsqinlik qilmoqda.

Narxlar darajasi yuqori boʻlgan Toshkent shahri, Toshkent, Samarqand va Navoiy viloyatlarida oʻsish deyarli oʻzgarmadi yoki sekinlashdi. Boshqa hududlarda oʻsish davom etmoqda, bunga narxlarning pasayishi, infratuzilmaning yaxshilanishi va talabning oshishi sabab boʻlmoqda.

Masalan, poytaxtda ikkilamchi bozordagi narxlar oy davomida 1 kvadrat metr uchun 15,28 million soʻmdan 14,9 million soʻmga, Toshkent viloyatida 8,33 million soʻmdan 8,21 million soʻmga tushdi.

Ijara bozorida taklifning oshishi va talabning mavsumiy pasayishi fonida narxlar barqaror boʻlib qolmoqda. Umuman olganda, respublika boʻyicha ijara stavkalarining oʻsishi nolga yaqin. Toshkentda ijara toʻlovlarining pasayishi davom etmoqda - iyun oyida pasayish yillik hisobda 6,1 foizni tashkil etdi.

Toshkent shahridagi yer uchastkalari segmentida iyun oyi yakunlari boʻyicha 100 kvadrat metr (1 sotix) yerning qiymati 334 million soʻmni tashkil etdi, bu 2024 yildagi qiymatlardan 2,5 foizga past.

Umuman olganda II chorakda koʻchmas mulk bozorida bitimlar soni va ipoteka kreditlari hajmining oʻsishi tufayli yuqori faollik saqlanib qoldi. Taklifning oʻsishi va xaridorlar uchun imkoniyatlarning kengayishi bozorning muvozanatli rivojlanishiga va narxlarning barqaror dinamikasiga hissa qoʻshadi.