Myanmada portlash: 55 kishi halok bo‘ldi, o‘nlab odamlar jarohatlangan

Xabarlarga ko‘ra, Myanmaning Kaung Tat qishlog‘ida yuz bergan portlash oqibatida kamida 55 kishi halok bo‘lgan. 

Qo‘zg‘olonchilar armiyasining ta’kidlashicha, portlashga tog‘-kon ishlarida foydalanish uchun saqlanayotgan moddalarning tasodifan portlab ketishi sabab bo‘lgan.

Ayni paytda Myanma harbiylari bilan sulh tuzgan va Xitoy chegarasi yaqinidagi ushbu qishloqni nazorat qilayotgan Taang Milliy Ozodlik Armiyasi (TNLA) qurbonlar bo‘lganini tasdiqladi, biroq ularning aniq sonini ma’lum qilmadi.

BBC hamda mahalliy “Shwe Phee Myay” axborot agentligi kamida 55 kishi, jumladan, 25 nafar ayol va 30 nafar erkak halok bo‘lgani, yana o‘nlab odamlar jarohatlangani haqida xabar berdi.

“Taang Milliy Ozodlik Armiyasi portlash oqibatida hayotdan ko‘z yumganlar, jarohat olganlar va zarar ko‘rganlarning oila a’zolariga chuqur hamdardlik bildiradi”, — deyiladi guruhning Telegram’dagi postida.

Unda mahalliy vaqt bilan tushda (Grinvich bo‘yicha 05:30) sodir bo‘lgan portlash yuzasidan tergov olib borilayotgani va aybdor deb topilgan har qanday shaxs javobgarlikka tortilishi ma’lum qilingan. 

Shuningdek, portlashdan jabr ko‘rgan oilalarga imkon qadar tezroq gumanitar yordam, tibbiy ko‘mak va reabilitatsiya ishlari taqdim etilishi qo‘shimcha qilingan.