Ozarbayjon muxolifat yetakchisi Ali Karimli “davlat to‘ntarishiga urinish”da ayblanmoqda

Ozarbayjon demokratik muxolifatining yetakchi vakili Ali Karimli Jinoyat kodeksining 278.1-moddasi (hokimiyatni zo‘ravonlik yo‘li bilan egallash, davlatning konstitutsiyaviy tuzumini kuch bilan o‘zgartirishga qaratilgan harakatlar) bilan ayblanmoqda.

Advokatlarining so‘zlariga ko‘ra, u aybdor deb topilsa, 12 yildan 20 yilgacha ozodlikdan mahrum etilishi mumkin.

2025-yil 1-dekabrdan buyon hibsda saqlanayotgan sobiq davlat kotibi Karimli bu ayblovlarni “butunlay uydirma va siyosiy sabablarga asoslangan” deya rad etdi.

Ali Karimli bir necha o'n yillardan buyon Ozarbayjon respublikasini boshqarib kelayotgan Aliyevlar rejimining boshog‘rig‘iga aylanib qolgan.

Ali Karimli advokatlari orqali France24 nashriga intervyu berarkan, unga nisbatan hech qanday jiddiy tergov olib borilmayotganini ta’kidladi.

“Ular nimalar to‘qiyotgani, buni qanday amalga oshirayotgani haqida na men, na advokatlarim ma’lumotga egamiz. Meni yolg‘on ayblovlar bilan qamoqqa tashlashlariga yagona sabab – siyosiy e’tiqodim va uni himoya qilishga bo‘lgan qat’iyatimdir. Men hech qanday jinoyat, hatto kichik ma’muriy huquqbuzarlik ham sodir etmaganman. Aynan shuning uchun ham o‘zimni vijdon mahbusi deb hisoblayman”, – dedi Ali Karimli.

Hibs muddati uzaytirildi

Ali Karimli 10-iyun kuni Bokuda “davlat to‘ntarishiga urinish” ayblovi bo‘yicha sud qilinishi kerak edi. Hozircha sud haqida batafsil ma’lumotlar yo‘q.

Oxu.az nashrining xabar berishicha, sud Ali Karimlining hibs muddatini yana 5 oyga uzaytirgan.