Londonda paydo bo‘lgan ko‘zi to‘silgan odam haykali muallifi aniq

Mashhur ko‘cha rassomi Benksi payshanba kuni London markazida paydo bo‘lgan, hilpirayotgan bayroq yuzini to‘sib qo‘ygan va poydevordan tushayotgan odam tasvirlangan yangi haykal o‘zining ijodi ekanligini tasdiqladi.

O‘zining Instagram sahifasida e’lon qilingan hajviy videoda Benksi haykalning yarim tunda qanday o‘rnatilganidan lavhalar ko‘rsatdi.

Rassom bu haqda post qo‘yishidan avval ham, poydevor asosiga uning imzosi tushirilgani uchun haykalni Benksiniki deb taxmin qilgan mahalliy aholi va sayyohlar uni ko‘rish uchun to‘planishgan edi.

Britaniya poytaxtida yangi asar haqidagi gap-so‘zlar avj olgan bir paytda, Benksining matbuot kotibi AFP agentligiga shunday dedi: “Rassom kecha tong saharda ruxsatsiz o‘rnatilgan yodgorlikni namoyon qildi. U Pall-Mall ko‘chasidagi yo‘l o‘rtasidagi orolchada joylashgan bo‘lib, Benksining aytishicha, bu yerda ozgina bo‘sh joy bo‘lgan”.

Ushbu haykal 1901–1910-yillarda hukmronlik qilgan qirol Edvard VII va afsonaviy hamshira Florens Naytingeyl haykallari hamda Qrim urushi yodgorligi yaqinida joylashgan.

Benksi odatda haykallari bilan tanilgan emas. U ko‘proq binolarga purkagich yordamida chizgan rasmlari bilan mashhur bo‘lib, uning ilk ijod namunalari 1990-yillar boshida Angliyaning janubi-g‘arbidagi ona shahri Bristol ko‘chalarida paydo bo‘lgan.

Shundan so‘ng Benksi butun dunyoga tanildi va uning asarlari hamda installyatsiyalari kimoshdi savdolarida millionlab dollarga sotildi. Rassomning ko‘cha san’ati ko‘pincha o‘g‘rilar va vandallarning nishoniga aylanadi.

Hozirgacha shaxsini oshkor etmagan Benksi o‘z san’atini jamoat joylarida yashirincha namoyish etishni “isyonkor ifoda shakli” deb bilgan ko‘cha rassomlari an’analarining bir qismidir.

“Biz Benksining navbatdagi haykaltaroshlik asarini ko‘rganimizdan xursandmiz... u shaharning jo‘shqin ommaviy san’at sahnasiga qo‘shilgan yorqin hissa bo‘ldi”, - yangi haykal paydo bo‘lgan hududga mas’ul Vestminster Kengashi vakili.

Kengashning qo‘shimcha qilishicha, haykalni himoya qilish bo‘yicha dastlabki choralari ko‘rilgan, biroq hozircha asar omma tomosha qilishi va zavqlanishi uchun ochiq qoladi.

Avvalroq Benksi taxallusini olgan ko‘cha rassomi shaxsi haqida xabar bergandik.