Suv xoʻjaligi sohasida ilmiy-tadqiqotlar mintaqaviy bazasi kengaytiriladi

Prezidentning 07.05.2024 yildagi PF-74-son Farmoni bilan Irrigatsiya va suv muammolari ilmiy-tadqiqot instituti huzurida Xorazm suv muammolari ilmiy-tadqiqot markazi tashkil etilgan.

Suv xoʻjaligi sohasida ilmiy-tadqiqot ishlarini rivojlantirish, ilm-fan va ishlab chiqarish oʻrtasida oʻzaro integratsiyani kuchaytirish uchun hujjatda Irrigatsiya va suv muammolari ITI huzurida Qashqadaryo mintaqaviy markazini tashkil etish nazarda tutilgan.

Xorazm va Qashqadaryo markazlarining bino va inshootlarini saqlash, shuningdek xodimlar (ilmiy xodimlardan tashqari) mehnatiga haq toʻlash bilan bogʻliq xarajatlarni moliyalashtirish 2025 yilda Suv xoʻjaligi vazirligining byudjetdan tashqari mablagʻlari hisobidan amalga oshiriladi, 2026 yildan boshlab esa Xorazm va Qashqadaryo viloyatlari mahalliy byudjetlari parametrlarida nazarda tutiladi.

Institutga qishloq xoʻjaligi maqsadlarida foydalaniladigan yer uchastkalari 30 yil muddatga ijara huquqida beriladi. Ularda quyidagilar boʻyicha tadqiqotlar olib boriladi:

zamonaviy suv hisobi tizimlarini joriy etish;

qishloq xoʻjaligi ekinlarini yetishtirishda suv resurslari sarfini hisoblash;

tuproq-iqlim sharoitlari va qishloq xoʻjaligi ekinlari turlariga qarab suvni tejaydigan sugʻorish texnologiyalarini joriy etishni takomillashtirish;

filtratsiyaga qarshi innovatsiya texnologiyalarini ishlab chiqish orqali sugʻorish tarmoqlarida suv yoʻqotishlarini kamaytirish va ularning samaradorligini oshirish;

suv xoʻjaligi sohasida erishilgan ilmiy natijalar, ilgʻor tajribalar va zamonaviy texnologiyalarni sinovdan oʻtkazish.