Fayzullayev nega Yevrokuboklarda oʻynamayapti?

Oʻzbekiston milliy terma jamoasi yetakchilari – Eldor Shomurodov va Abbosbek Fayzullayev endi hamkorlikda “Istanbul Bashakshehir” jamoasi sharafini himoya qiladi.

Turkiya chempionati hali start olishiga bir necha kun boʻlsa-da, “Bashakshehir” uchun mavsum ertaroq boshlandi. Oʻtgan mavsumda Superligani beshinchi oʻrinda yakunlagan istanbulliklar xalqaro maydonda Turkiya sharafini himoya qilishga kirishdi.

“Istanbul Bashakshehir” UYeFA Konferensiyalar ligasi saralash turniri ikkinchi bosqichida Bolgariyaning “Cherno More” jamoasi bilan ikkita uchrashuvda kuch sinashib, safarda 1:0 va oʻz uyida 4:0 hisobida zafar quchdi.

“Roma”dan keyinchalik toʻliq transfer qilish huquqi bilan ijaraga olingan Eldor Shomurodovning yangi klubidagi dastlabki ikki oʻyini aynan mana shu uchrashuvlarga toʻgʻri keldi.

Shomurodov hozir uchinchi bosqich bahslariga tayyorgarlik koʻrmoqda. “Istanbul Bashakshehir” 7 va 13 avgust kunlari Norvegiyaning “Viking” jamoasi bilan ikkita oʻyin oʻtkazadi.

Oʻzbekistonlik futbol ishqibozlarini boshqa masala qiziqtirmoqda. “Bashakshehir”ga oʻtgani bir necha kun boʻlgan Abbosbek Fayzullayev nega Konferensiyalar ligasi bellashuvlariga jalb qilinmayapti? “Viking” bilan boʻladigan oʻyinda Fayzullayevni maydonda koʻramizmi?

Bu savollarga rossiyalik jurnalist rossiyalik jurnalist Aleksandr Troitskiy oydinlik kiritdi.

- Abbosga 14 avgustga qadar boʻladigan oʻyinlarga taqiq qoʻyilgan. Norvegiyaliklarga qarshi boʻladigan bellashuvlarda ham Fayzullayev oʻynamaydi.

Biz “Istanbul Bashakshehir” musobaqaning keyingi bosqichiga chiqishiga va Abbos bu mavsum Yevrokuboklarda debyutini nishonlashiga umid qilib qolamiz, - deb yozdi Aleksandr Troitskiy.

Fayzullayevning sobiq klubi – SSKAning kommunikatsiyalar boʻyicha direktori Kirill Breydo tez kunlarda “Istanbul Bashakshehir” oʻzbek futbolchisi transferi boʻyicha toʻlovlarni oxiriga yetkazishini maʼlum qildi.

- Abbos Fayzullayevning transferi boʻyicha klubni qoniqtiradigan moliyaviy kafolatlar biz uchun juda muhim edi va muzokaralar shundan kelib chiqib oʻtkazildi. Tez orada “Istanbul Bashakshehir” SSKA bilan transfer boʻyicha toʻliq hisob-kitob qiladi. Biz Abbosga muvaffaqiyat va futboldagi orzulari roʻyobini koʻrishini tilaymiz.

Abbosning ketgani hujum chizigʻini kuchaytirish uchun qidiruv boshlashimizga sabab boʻldi. Ommaviy axborot vositalarida tarqatilayotgan nomlardan qaysidir biri  toʻgʻri, boshqalari xato berilyapti. Ayrim muzokaralarda ancha oldinga siljish bor, baʼzilari sekin ketyapti. Nomzodlardan bir nechtasi haqidagi maʼlumotlarni matbuotga sizishining oldi olindi. Lekin hujum kuchaytirilishi aniq, - dedi Kirill Breydo.

Abbosbek Fayzullayev transferi uchun “Istanbul Bashakshehir” 7,5 million yevro badal puli toʻlashi kelishilgan. Bundan tashqari legionerimiz natijalariga qarab, ikki yarim million yevro bonus ham koʻzda tutilgan.

Turk klubi Fayzullayevning oʻzi bilan besh yillik shartnoma imzolagan. Ekspertlar “Istanbul Bashakshehir” oʻzbekistonlik hujumkor futbolchi uchun kelajakda Yevropaning top-ligalariga tramplin boʻladi, degan fikrni ilgari surmoqda.