60 kilogrammdan ziyod giyohvandlik moddasining savdosiga chek qoʻyildi

Maʼlum qilinishicha, dastlabki qonunbuzarlik Fargʻona viloyatida sodir etilgan. Unda "Toshkent-Fargʻona" yoʻnalishida harakatlanayotgan, Margʻilon shahrida yashovchi shaxs boshqaruvidagi "Damas" rusumli avtomashina "Namangan" YPX maskanida toʻxtatilib, koʻzdan kechirilgan. Natijada avtotransport vositasining orqa oʻrindigʻiga yashirib qoʻyilgan 9 kg 573 gr "gashish" moddasi borligi aniqlangan hamda tegishli tartibda rasmiylashtirib olingan.  

Shuningdek, tergovga qadar tekshiruv harakatlari davomida mazkur shaxsning yashash xonadonidan 2 kg 779 gr "gashish" va 1 kg 29 gr "opiy" moddalari hujjatlashtirib olingan. Tezkor tadbir davomida ushbu fuqaroning Fargʻona va Margʻilon shaharlarida istiqomat qiluvchi sheriklari ham qoʻlga olingan. Ulardan biri muqaddam giyohvandlik vositalari savdosi bilan bogʻliq jinoyati uchun sudlangan. 

Navbatdagi ogʻufurushlik esa Xorazm viloyatida sodir etilgan. Masʼul organ xodimlari tomonidan "Samarqand-Xorazm" yoʻnalishida harakatlanayotgan, Samarqand shahrida yashovchi fuqaro boshqaruvidagi "KIA"  rusumli avtotransport vositasi toʻxtatilib, koʻzdan kechirilgan. Natijada avtomashinada 2 kg 821 gr "opiy" moddasi borligi aniqlanib, protsessual tartibda rasmiylashtirib olingan. 

Aniqlanishicha, u Tojikiston Respublikasida yashovchi fuqarodan har bir kilogrammini 6500 AQSh dollaridan sotib olgan va ushbu narkotik moddani Xorazm viloyatidagi giyohvandfurushlarga sotishni rejalashtirgan. 

Bundan tashqari, Davlat xavfsizlik xizmati va Ichki ishlar organlari xodimlari hamkorligida oʻtkazilgan tezkor tadbirda Toshkent shahrining Yashnobod tumanida istiqomat qiluvchi fuqaroning yashash xonadoni xolislar ishtirokida koʻzdan kechirilgan.

"Unda kir yuvish vositalari paketlariga qadoqlangan 45 kg 898 gr kristall kukunsimon moddalar mavjud boʻlib, ularning tarkibida "Pregabalin" kuchli taʼsir qiluvchi moddasi borligi aniqlandi. Shuningdek, tadbir davomida 1 kg 190 gr "Tropikamid" moddasi ham musodara qilindi", 

deyiladi DXX tomonidan berilgan maʼlumotda. 

Yana bir holat esa Toshkent shahrining Mirobod tumanida aniqlangan. Fargʻona viloyatining Dangʻara tumanida yashovchi, muqaddam bir necha marotaba sudlangan shaxs 1512 dona "Regapen" va 300 dona "Tropikamid" kuchli taʼsir qiluvchi dori vositalarini Toshkent shahrida istiqomat qiluvchi, muqaddam bir necha marotaba sudlangan fuqaroga 60 mln soʻmga sotayotgan vaqtida ushlangan. Maʼlum boʻlishicha, ushbu dori vositalari Qirgʻiziston Respublikasidan olib kelingan. 

Hozirda mazkur shaxslarning barchasiga nisbatan jinoyat ishlari qoʻzgʻatilib, qamoq ehtiyot chorasi qoʻllanilgan.