Quruq vaʼda: 1 yildan buyon gazlashtirilmagan xonadonlarga imtiyoz berish tartibi ishlab chiqilmayapti

Oʻzbekistondagi gazlashtirilmagan xonadonlarga elektr energiyasi toʻlovlari uchun imtiyozlar berish tizimi yil yakuniga qadar hukumatga kiritilishi mumkin. Bu haqda 2025 yil 28 oktabr kuni Milliy matbuot markazida Energetika vazirligi tomonidan oʻtkazilgan matbuot anjumanida maʼlum qilindi.

 
Amaldagi qonunchilikka koʻra, gazlashtirilmagan koʻp qavatli uylar markazlashgan elektr tarmogʻiga ulangan boʻlsa, 50 foiz elektr energiyadan chegirma taqdim etiladi. Biroq hozirga qadar gazlashtirilmagan hovlilar uchun mazkur tartibni qoʻllash boʻyicha qonunchilikka oʻzgartishlar kiritilmagan.

Mazkur xabarlarga iqtisodchi Otabek Bakirov munosabat bildirdi.

«Qishloq joylarda gazlashmagan xonadonlarda yashovchilar oʻtgan yili oktabrda berilgan vaʼdaning ijrosini haliham kutmoqda va bu ketishda yana kutadi.

Albatta, masala bironta oʻgʻri oligarxga imtiyoz berish bilan bogʻliq boʻlganida necha kunda yashirin qaror bilan maʼqullab berilgan boʻlardi, bilganlar biladi. Lekin gap millionlab oʻzbekistonliklar haqida ketmoqda. Vaʼda vaʼdaligicha yoki reja rejaligicha qolib ketishi ehtimoli afsuski, yana juda yuqori, agar 2026 yil byudjetida gazlashmagan xonadonlarga imtiyoz bilan bogʻliq masala aks etmagan boʻlsa.

Oʻzi buni imtiyoz deb atash ham oʻrinsiz, bu gazlashmagan xonadonlarda yashovchilarning haqi aslida. Bunga qoʻshimcha subsidiyalash ham kerakmas».