Turkmaniston rahbari Mirziyoyevni medal bilan mukofotlashini aytdi

Qayd etilishicha, Turkmaniston Prezidenti Serdar Berdimuhamedov raisligida oʻtgan tadbirda Rossiya Federatsiyasi Prezidenti Vladimir Putin, Qozogʻiston Respublikasi Prezidenti Qasim-Jomart Toqayev, Qirgʻiz Respublikasi Prezidenti Sadir Japarov, Tojikiston Respublikasi Prezidenti Emomali Rahmon, Eron Islom Respublikasi Prezidenti Masʼud Pezeshkiyon, Pokiston Islom Respublikasi Prezidenti Osif Ali Zardariy, Moʻgʻuliston Prezidenti Uxnaagiyn Xurelsux, Armaniston Respublikasi Prezidenti Vaagn Xachaturyan, xorijiy davlatlar parlamentlari rahbarlari va yuqori martabali vakillari, xalqaro va mintaqaviy tashkilotlar boshliqlari ishtirok etgan. 

Mazkur tadbirda Mirziyoyev soʻzga chiqib, ushbu forumning oʻtkazilishi xalqlar oʻrtasidagi birodarlik va hamjihatlik rishtalarini mustahkamlash, mamlakatlarni bir-biriga yanada yaqinlashtirishini taʼkidlagan. Shuningdek, Prezident Maxtumquli Firogʻiyning ijodiy merosi nafaqat Sharq mumtoz sheʼriyatini, balki jahon adabiyotini ham boyitganligi eslatib oʻtgan.

"Oʻzbekistonda Maxtumquli ijodi yuksak qadrlanadi. Shoir Xiva shahridagi Shergʻozixon madrasasida tahsil olib, dunyoviy va diniy ilmlarni oʻrgangan. U buyuk oʻzbek shoiri va mutafakkiri Alisher Navoiyni chuqur hurmat qilgan", deydi Oʻzbekiston rahbari.

Bundan tashqari, Prezident joriy yilda Oʻzbekistonda Maxtumquli Firogʻiy tavalludining 300 yilligi keng nishonlanayotgani bildirilgan. Shoir tavalludiga bagʻishlanib anjuman, seminar, adabiy kecha, tanlov, spektakllar va boshqa tadbirlar oʻtkazilayotganligiga toʻxtalgan. Shu oʻrinda Oʻzbek va turkman kinoijodkorlari tomonidan shoir haqida hamkorlikda badiiy film suratga olinishini ham eʼlon qilgan. 

Oʻzbekiston yetakchisi Turkmaniston tashabbusi bilan BMT Bosh Assambleyasi tomonidan eʼlon qilingan "Xalqaro tinchlik va ishonch yili" doirasida kelgusi yili Ashxobod shahrida global sammit oʻtkazilishini qoʻllab-quvvatlashini bildirgan. 

Turkmaniston Prezidenti Serdar Berdimuhamedov Oʻzbekiston Prezidentiga mazmunli nutq hamda Maxtumquli Firogʻiy xotirasini abadiylashtirish borasida Oʻzbekistonda amalga oshirilayotgan chora-tadbirlar uchun minnatdorlik bildirib, turkman shoiri va mutafakkiri tavalludining 300 yilligi munosabati bilan Mirziyoyevni medal bilan mukofotlash toʻgʻrisidagi qaror qabul qilinganini maʼlum qildi.