Xitoy Oʻzbekistonda kasbga tayyorlash markazini ochmoqchi

Qayd etilishicha, Oʻzbekiston Bosh konsulxonasi koʻmagida Oʻzbekiston Oliy taʼlim, fan va innovatsiyalar vazirligi, Migratsiya agentligi hamda Xitoyning "JC Finance Interconnect Holdings" kompaniyasi raisi U Tinyi oʻrtasida onlayn uchrashuv oʻtkazilgan. 

Muzokaralar davomida Oʻzbekistonda yashil energetika, qishloq xoʻjaligi, AKT, turizm kabi soha mutaxassislari uchun xalqaro standartlar asosida qayta tayyorlash va malakani oshirish dasturlarini ishlab chiqish masalalari muhokama qilingan.

"Tomonlar, shuningdek, Oʻzbekiston talabalari uchun Xitoyning yetakchi oliy oʻquv yurtlarida grantlar ajratish va nomzodlarni tanlash xususida fikr almashdilar", deyiladi xabarda.

Bundan tashqari, uchrashuv yakunida "JC  Finance Interconnect Holdings" kompaniyasi vakillarining Oʻzbekistonga safarini tashkil etishga kelishib olingan. Safar davomida Oʻzbekiston fuqarolarini taʼlim va kasbiy faoliyatga tayyorlash boʻyicha xizmatlar koʻrsatish markazini ochish yuzasidan tegishli vazirlik va idoralarda uchrashuvlar oʻtkazilishi rejalashtirilgan.