Эронда норозилик намойишларида 45 киши ҳалок бўлди, интернет бутунлай узилди

Эронда 28 декабрдан буён давом этаётган оммавий норозилик намойишларида ҳалок бўлганлар сони камида 45 кишига етди. Намойишлар фондида мамлакат бўйлаб интернет узиб қўйилди, деб хабар берди Deutsche Welle.

Намойишчилар 8 январ куни Теҳроннинг асосий кўчаларидан бири — Оятуллоҳ Кошоний хиёбонини тўсиб қўйди. Хавфсизлик кучлари ниқоб таққан намойишчиларга қарши кўздан ёш оқизувчи газ қўлламоқда. Шунингдек, Машҳад, Кирмоншоҳ ва бошқа йирик шаҳарларда ҳам оммавий норозилик намойишлари кузатилмоқда.

Буюк Британиянинг NetBlocks ташкилотига кўра, Эронда намойишлар фондида интернет-трафик тахминан 90 фоизга камайган. Интернетга эркин кириш фақат амалда ва куч ишлатиш тизими вакиллари учун сақланиб қолган.

АҚШ президенти Дональд Трамп Salem News Channel телеканалга берган интервьюсида Теҳрондаги раҳбариятга нисбатан олдин билдирган таҳдидларини такрорлади:

“Мен уларга агар одамларни ўлдиришни бошлашса, қаттиқ чоралар кўришимизни аниқ тушунтирдим. Улар тартибсизликлар пайтида тез-тез шундай қилади, уларда тартибсизликлар кўп кузатилади,” — деди у ва эронликларни “жасур халқ” деб атади.

АҚШ президенти унинг маъмурияти вазиятни диққат билан кузатиб боришини билдирди. Намойишлар бошланганидан бери Норвегиянинг Iran Human Rights (IHR) ташкилоти камида 45 нафар киши ҳалок бўлганини қайд этди. Улар орасида саккиз нафар вояга етмаган бола ҳам бор.

Норозиликлар иқтисодий танглик фондида бошланди
 

Эронда норозилик намойишлари риал курсининг кескин тушиши фондида бошланди. Дастлаб, Теҳроннинг асосий бозорида дўкондорлар гиперинфляция ва нархларнинг кескин ўзгаришига қарши савдо нуқталарини ёпган.

Эрон иқтисодиёти халқаро санкциялар сабаб жиддий босим остида қолмоқда. Миллий валюта — риал, 2025 йил давомида АҚШ долларига нисбатан қийматининг учдан биридан кўпроғини йўқотган.

Ҳукумат  4 январ куни иқтисодий босимни юмшатиш мақсадида ҳар бир фуқаро учун ойлик нафақа жорий этилишини эълон қилди. Ушбу тўлов ўртача ойлик иш ҳақининг тахминан 3,5 фоизига тенг. Аҳолиси 90 миллиондан ортиқ бўлган Эронда энг кам иш ҳақи тахминан 100 доллар, ўртача ойлик маош эса 200 доллар атрофида.