Трамп сурати туширилган банкнота чиқиши мумкин

The Washington Post нашрининг ёзишича, Трамп маъмурияти вакиллари АҚШнинг банкноталарни босиб чиқариш учун масъул муассасаси — Banknota ва қимматли қоғозларни босиб чиқариш бюроси ходимларига президент сурати туширилган 250 долларлик банкнота дизайнини ишлаб чиқиш бўйича босим ўтказган.

Трамп сурати туширилган намунавий дизайн

Нашр қўлга киритган маълумотларга кўра, 2025 йил август ойидаёқ бюро ходимларига Дональд Трампнинг сурати ва имзоси акс этган 250 долларлик банкнотанинг намунавий дизайни тақдим этилган.

Агар ушбу ташаббус амалга оширилса, бу АҚШ тарихида сўнгги 150 йилдан зиёд вақт мобайнида тирик шахс тасвирланган биринчи расмий пул белгиси бўлади.

АҚШ Молия вазири ғояни қўллаб-қувватлади

АҚШ Молия вазири Скотт Бессент мазкур ташаббусни очиқ қўллаб-қувватлади. У Fox Business телеканалига берган интервьюсида мамлакат мустақиллигининг 250 йиллиги муносабати билан Трампнинг тасвири эсдалик пулларида акс этиши кераклигини таъкидлади.

Унинг сўзларига кўра, АҚШнинг 150 йиллик юбилейи муносабати билан Калвин Кулидж махсус тангада тасвирланган бўлса, 250 йиллик юбилейда бу шараф Трампга насиб этиши лозим.

Қонунчиликдаги чеклов

Амалдаги АҚШ қонунчилигига кўра, миллий валютада фақат вафот этган шахсларнинг сурати жойлаштирилиши мумкин. Шу сабабли Жо Уилсон мазкур чекловни бекор қилиш мақсадида қонун лойиҳасини тақдим этган.

Бироқ ҳозирча ушбу ташаббус Конгресс томонидан маъқулланган эмас.

Уилсоннинг фикрича, Трамп суратини юбилей банкнотасига жойлаштириш сиёсий эмас, балки тарихий ва рамзий аҳамиятга эга қарор бўлади.

Танқидчилар нима демоқда?

Ташаббус танқидчилари эса бу ғоя АҚШнинг кўп йиллик давлатчилик анъаналарига зид эканини таъкидламоқда.

Экспертлар фикрича, амалдаги президент тасвирининг пул белгисида пайдо бўлиши давлат рамзларининг сиёсийлашувига олиб келиши мумкин. АҚШ тарихида ҳозиргача ҳеч бир амалдаги президент миллий валютада тасвирланмаган.

Freedom 250 тадбирлари доирасида янги лойиҳалар

АҚШ мустақиллигининг 250 йиллигини нишонлаш учун ташкил этилган Freedom 250 Commission томонидан бир қатор йирик тадбирлар режалаштирилган.

Улар қаторида:

• Миллий хиёбонда давлат ярмаркаси;
• FIFA World Cup 2026 мухлислари маркази;
• Оқ уй ҳудудида IndyCar пойгалари;
• UFC жангларини ташкил этиш каби лойиҳалар бор.

Шунингдек, Трамп тасвири туширилган 1 долларлик эсдалик тангаси лойиҳаси ҳам АҚШнинг Тасвирий санъат комиссияси томонидан дастлабки қўллаб-қувватловга эга бўлган.

Ҳозирча Дональд Трамп сурати туширилган 250 долларлик банкнота расман тасдиқланган эмас. Бироқ ушбу ташаббуснинг ўзиёқ АҚШда сиёсат, тарих ва миллий рамзлар атрофидаги баҳсларни янада жонлантирди.