Исроил Ғазода озиқ-овқат кутаётган фаластинликлар ҳамда тинч аҳолини ўлдирди

Ғазода вазият кундан-кунга оғирлашиб борар экан, АҚШ ва Исроил етакчилари эҳтимолий ўт очишни тўхтатиш келишувини муҳокама қилмоқда. Шу билан бирга, халқаро ҳамжамият урушни тўхтатишга чақирмоқда.

"Al Jazeera" телеканали мухбири Муас ал-Каҳлутнинг Ғазо шаҳридан берган маълумотларига кўра, Исроил зарбаларидан сўнг ал-Аҳли касалхонасига ўнлаб ярадорлар олиб келинган.

"Бу ерда жуда кўп ярадор тинч аҳоли вакиллари бор, уларнинг орасида болалар ҳам талай. Касалхона имкониятлари етарли эмас, жой ва тиббий воситалар танқислиги сабабли кўпчилик беморлар ерда ётишига мажбур", — деди ал-Каҳлут.

Исроил армияси Ғазо шаҳри шарқида яшовчиларга жанубга кўчишни буюрувчи варақаларни ташлаган. Мухбирнинг айтишича, бундай варақалардан сўнг одатда ҳудудлар интенсив бомбардимон қилинади ва натижада кўплаб қурбонлар бўлаётгани кузатилмоқда.

Ёрдам кутиб ўлганлар

Рафаҳ шаҳри шимолида, танқид остида қолаётган Ғазо Гуманитар Фонди (GHF) томонидан ташкил этилган озиқ-овқат тарқатиш пунктлари яқинида камида беш нафар фаластинлик ўлдирилгани ҳақида ҳам хабар берилмоқда.

Эслатиб ўтамиз, GHF май ойи охирида АҚШ ва Исроил кўмагида Ғазога чекланган ёрдам етказишни бошлаган эди. Шундан буён Исроил ҳарбийлари ушбу тарқатиш нуқталари атрофида ёрдам кутаётган фуқароларга ўқ узгани қайд этилган. Ғазо ҳукумати матбуот хизматининг маълумотига кўра, бу ҳолатларда 580 нафардан ортиқ одам ҳалок бўлган, 4 мингдан ортиғи яраланган.

Исроилнинг "Haaretz" нашрида чиққан ҳисоботда эса айрим исроиллик аскарлар оммавий ёрдам олувчиларга қарата ўқ узиш бўйича буйруқ олганларини тан олгани ёзилган.

"Ёрдам етказиш баҳонасида одам ўлдириш — тушунарсиз ва фожиали"

Халқаро жиноят ҳуқуқи бўйича мутахассис, ҳуқуқшунос Жоффри Найс “Al Jazeera”га берган интервьюсида GHF атрофидаги ўлимлар ҳақида фикр билдирар экан, бу ҳолатларни "тушуниб бўлмайдиган" деб атади.

"Бу ташкилот ёрдам кўрсатиш учун ташкил этилган бўлса-да, айнан унинг фаолияти атрофида юзлаб одамлар ўлдирилмоқда. Бу ташқаридан қараганда мутлақо ақл бовар қилмас ҳолат", — деди Найс.