АҚШ, Россия ва Хитой ядровий қуролсизланишни муҳокама қилмоқда

АҚШ президенти Дональд Трамп 15 октябрь куни Вашингтон Россия ва Хитой билан ядровий қуролсизланиш масаласида музокаралар олиб бораётганини билдирди. Бу ҳақда Reuters агентлиги хабар берди.

Трамп Newsmax телеканалига берган интервьюсида дунёдаги энг йирик ядровий арсеналларга эга давлатлар ўртасида қуролларни қисқартириш имкониятлари муҳокама қилинаётганини айтди.

«Имкон бўлса, ядровий қуроллардан воз кечишни жуда истардим. Биз бу масалада Россия билан ҳам, Хитой билан ҳам музокара олиб боряпмиз», — деди Трамп.

У, шунингдек, Хитой кейинги беш йил ичида АҚШ даражасига етиб олиши мумкинлигини таъкидлади. Newsmax хабарига кўра, Трамп Хитой раҳбари Си Цзиньпин билан ҳам ядровий қуролсизланиш масаласини муҳокама қилган.

"New START" шартномаси муддати тугаган

Трампнинг баёноти стратегик ядровий қуролларни чеклашга қаратилган New START шартномаси муддати 2026 йилда тугаганидан кейин янгради.

2010 йилда имзоланган ушбу шартнома АҚШ ва Россиянинг стратегик ядровий қуролларини чеклашни назарда тутган. Кейинчалик ҳужжат муддати беш йилга узайтирилган эди. Reuters маълумотига кўра, шартномадаги чекловларни яна узайтириш учун янги сиёсий қарор талаб этилади.

Стокгольм халқаро тинчлик тадқиқотлари институти (SIPRI) маълумотларига кўра, сақланаётган ядровий каллаклар сони бўйича Россия биринчи, АҚШ иккинчи, Хитой эса учинчи ўринда туради. Бироқ жойлаштирилган ядровий каллаклар сони бўйича АҚШ Россиядан олдинда.

Муаллиф: Ҳасанбой ОЧУН