Россиянинг Украинага ҳужуми оқибатида 9 киши ҳалок бўлди, ўнлаб одам жароҳатланди

Сўнгги ҳафталарда Россия Украина шаҳарларига баллистик ракеталар билан зарба беришни кучайтирди. Украина ҳам жим қараб турмасдан Россиянинг фронт чизиғидан анча узоқ ўлкаларига ҳужум қилмоқда.

Маҳаллий расмийларнинг маълум қилишича, сешанба тунида уюштирилган ҳужумлар Киев, Запорижжя ва Днепропетровск вилоятларини қамраб олган.

Запорижжя вилояти ҳарбий маъмурияти раҳбари Иван Федоров Россия ракеталар ва бошқариладиган авиабомбалардан фойдаланган ҳолда кенг кўламли ҳужум уюштирганини айтди.

“Олти киши ҳалок бўлди, яна 19 киши яраланди”, — деди Федоров.

Шарқдаги Днепропетровск вилоятида эса Россиянинг дрон ва артиллерия зарбалари бешта туманни нишонга олиб, уч кишининг ўлимига ва яна беш кишининг яраланишига сабаб бўлди.

Киев мери Виталий Кличко ижтимоий тармоқларда пойтахт “баллистик ракеталар ҳужуми остида” эканини маълум қилди.

Президент Владимир Зеленский бундан аввал Россия Шимолий Кореядан келадиган қўшимча қўшинларни жойлаштиришга тайёргарлик кўраётгани ҳамда Пхеняндан янги баллистик ракеталар харид қилганини айтганди.

Саноқли ҳаво мудофаа тизимлари, жумладан, АҚШда ишлаб чиқарилган Patriot мажмуалари баллистик ракеталарни тутиб қолишга қодир.

Февраль ойида АҚШ ва Исроилнинг Эронга қарши бошлаган уруши ортидан PAC-3 тутиб қолувчи ракеталарининг танқислиги янада кучайган.