Трамп 1,5 трлн долларлик ҳарбий бюджетни сўради: Конгрессда баҳслар кучаймоқда

 The New York Times хабарига кўра, Оқ уй Конгрессдан 1,5 триллион доллар миқдорида маблағ ажратишни сўраган — бу АҚШ тарихидаги энг йирик ҳарбий бюджет бўлиши мумкин.

Президент бу қарорни Эрон билан боғлиқ ҳарбий зиддият ва қурол-яроғ захираларини тиклаш зарурати билан изоҳлаган. Унинг таъкидлашича, миллий хавфсизлик устувор бўлиб, ижтимоий харажатларни қисқартириш ҳисобига молиялаштириш таклиф этилмоқда.

Режага кўра, маблағнинг 1,1 триллион доллардан ортиғи стандарт бюджет орқали, яна 350 миллиард доллари эса махсус молиявий механизмлар орқали ажратилиши мумкин. Шу билан бирга, иқлим, таълим ва уй-жой дастурлари бўйича 73 миллиард долларгача қисқартириш режалаштирилган.

Аксинча, куч тузилмаларига ажратиладиган маблағ оширилади. Жумладан, Адлия вазирлиги бюджети сезиларли ўсиши, чегара хавфсизлиги ва депортация сиёсати учун қўшимча ресурслар ажратилиши кутилмоқда.

Конгрессда ушбу ташаббусга нисбатан турли фикрлар билдирилмоқда. Айрим қонун чиқарувчилар маъмуриятни ташқи ҳарбий операциялар устидан парламент назоратини чеклаётганликда танқид қилмоқда.

Таҳлилларга кўра, агар бу режа қабул қилинса, АҚШ давлат қарзи яқин ўн йилликда сезиларли даражада ошиши мумкин.

Айни пайтда Яқин Шарқдаги вазият ҳам кескинлигича қолмоқда. Ҳарбий ҳаракатлар давом этаётгани, томонлар ўртасида қарама-қаршилик сақланиб қолаётгани қайд этилмоқда.