Хитойда 11 нафар болани ўғирлаб сотган жиноятчи қатл этилди

Маълумотларга кўра, Ван исмли шахс 2001 йилдан бошлаб жиноий фаолият юритиб, турли ҳудудларда 6 ёшгача бўлган болаларни ўғирлаб, бошқа провинцияларга сотган. Илк бор 2006 йилда ушланган у, қисқа муддатли жазодан сўнг озодликка чиққан ва жиноятларини давом эттирган.

Қўшимча тергов натижасида унинг 2001–2010 йиллар оралиғида Хунань, Хубэй ва Сичуань ҳудудларидан камида 11 нафар болани ўғирлаб, Гуандунга сотгани аниқланган. Ушбу жиноятлар орқали у қарийб 199 минг юань даромад олган.

Тергов материалларига кўра, жиноятлар жабрланган оилаларга оғир руҳий ва молиявий зарар етказган. Айрим ҳолларда оилалар пароканда бўлган, баъзи ота-оналар эса ўз жонига қасд қилишга уринган.

Суд жиноятларнинг кўлами, шафқатсизлиги ва айбланувчининг бир неча бор жиноят содир этганини инобатга олиб, унга нисбатан ўлим жазосини тайинлаган. Ҳукм ижро этилди.