Мадагаскарда президент ағдарилди

Сентябрь ойи охирларидан бошлаб мамлакатда электр таъминотидаги узилишлар ва ишсизликка қарши кенг кўламли намойишлар бошланган эди. “Gen Z” деб аталган ёшлар ҳаракати ҳукуматдан ислоҳотлар ва президентнинг истеъфосини талаб қилди.

Намойишлар шиддатланган сари, 29 сентябрда Раджоэлина ҳукуматни тарқатди, аммо бу қарор вазиятни юмшатмади. 11 октябрда эса элита ҳарбий бўлинмаси — CAPSAT президент буйруқларини бажаришдан бош тортди ва “мамлакатни қутқариш учун” сиёсий бошқарувни ўз қўлига олишини маълум қилди.

Маҳаллий ОАВ хабарига кўра, президент 13 октябр куни мамлакатни тарк этган ёки номаълум жойда яширинган. 14 октябрда парламент уни расман импичмент билан вазифасидан озод этди.

Ҳозирда ҳарбийлар раҳбари полковник Михаил Рандрианицина вақтинчалик давлат раҳбари сифатида эълон қилинди. У Конституциянинг амалиётини вақтинча тўхтатиш ва яқин ойларда янги сайловлар ўтказиш ниятини билдирган.

Халқаро ташкилотлар Мадагаскардаги вазиятдан ташвиш билдириб, ҳарбийлардан конституцион тартибни тиклашни талаб қилмоқда. Африка Иттифоқи ва БМТ бу воқеани “қонунсиз ҳокимият алмашинуви” деб баҳолади.

Ҳозирги кунда мамлакат пойтахти Антананаривуда ҳарбийлар барча стратегик биноларни назоратга олган. Интернет ва телевидение ишида узилишлар кузатилмоқда. Ҳукуматга яқин манбалар вазият тинч йўл билан барқарорлаштирилишига умид билдирмоқда.