updated: 22.03.2026, 04:45

Нега айрим қозоқ дўстларимиз Ўзбекистон ютуқларидан хурсанд бўлмаяпти?

Ўзбекистон президенти Шавкат Мирзиёев яқинда АҚШнинг Нью-Йорк шаҳрида бўлиб ўтган БМТ Бош Ассамблеяси сессияси доирасида муваффақиятли дипломатик ютуқларга имзо чекди. Хусусан, Бош Ассамблея минбарида туриб минтақа ва глобал муаммоларни кўтариш билан бирга, уларга ечимлар ҳам таклиф этди. АҚШ президент Доналд Трамп билан кўришиб, музокаралар ўтказгани, икки давлат ишбилармонлари, йирик компаниялари ўртасида бир неча миллиард долларлик шартномаларнинг имзоланиши ҳам катта ютуқ сифатида эътироф этилди.

Ўзбекистон

07.10.2025, 12:03

Lotinchada

Улашиш:

Аммо, негадир бу одимларимиз айрим қардошларимизга хуш келмади. Ижтимоий тармоқлар нега Ўзбекистон президенти Доналд Трамп билан кўришдию бизники учрашмади, ўзбеклар биздан ўзиб кетмоқчи қабилидаги гап-сўзларга тўлиб-тошди. Бу ҳам етмагандек, Қозоғистон президенти Қосим Жўмарт Тўқаев ўз юртига қайтар-қайтмас ташқи ишлар вазири, мамлакатнинг АҚШдаги элчиси ва бошқа бир қатор амалдорларни ишдан олди. Қозоқ ҳамкасбларимиз ҳам жим турмай, янги тайинланган ТИВ раҳбарига Ўзбекистон Марказий Осиёдаги етакчиликни ўз қўлига олмоқчими қабилидаги провакацион саволларни беришди. Вазир дипломатик қонун-қоидалардан четга чиқмасликка ҳаракат қилди бироқ бот-бот “Вазиятни кўрмоқчи бўлсанглар, иқтисодий кўрсаткичларга қаранглар, шунинг ўз етарли”, деди.

Бундай ҳолатлар аввал ҳам кузатилгани эътиборга молик. Айниқса, спорт соҳасида. Кўпинча спорт оламида бирор бир натижа қайд этишимиз билан қозоқлар очиқчасига нега биз ололмадик, ўзбеклар олди, деган саволни беришади. Бундан биз зўрмиз, улар кучсиз, деган хулосага бормаслик керак. Ҳар ким ўз куч ва имкониятлари даражасида кучли ва тенгсиз. Қозоқлардан ўрганишимиз, ўрнак олишимиз керак бўлган жиҳатлар кўп. Айниқса иқтисодиёт, инфратузилма, экология, ҳатто спорт соҳасида ҳам катта тажрибага эга. Уларнинг ҳар бир ютуғи билвосита бизга ҳам ижобий таъсир кўрсатади. Зеро географик жиҳатдан бир минтақада жойлашганимиз, умумий муаммоларимизнинг мавжудлиги, масалан трансмиллий дарёлар, Орол масаласи, шимолдан эсаётган империализм шамоллари бизни доим бирдамликка, ҳамжиҳатликка чорлайди.

Шу билан бирга, елкама-елка туриб эришиладиган ютуқлар, имкониятларимиз ҳам йўқ эмас. Туризм, қишлоқ хўжалиги, ишлаб чиқариш, катта бозорларга чиқиш потенциали ва бошқаларга кўз юмиб бўлмайди. Бундай вазиятда биз ундай, улар бундай дейиш ўз илдизимизга болта уриш, ўзимиз турган шохни арралаш, умумий душманларга осонгина ем бўлишга тайёрланишдан бошқа нарса эмас. Хурматли юртдошлар, азиз қўшнилар, бовурларимиз, замон қўлни қўлга берадиган, елкага елкани тутадиган замон. Биз бир бўлсаккина замон тўфонларига қарши тура оламиз. Орамизга душманлик уруғини сочмоқчи бўлганларга имкон бермайлик, бир-биримизнинг ютуқларимиздан хурсанд бўлиб, муаммоларимизга ҳамдард бўлайлик. Яхши кунларда кўришгунча.

Ўзбекистон

07.10.2025, 12:03

Улашиш:

#Қозоғистон #Ўзбекистон

мавзуга оид янгиликлар