ИИВ раҳбарияти илк бор Фурқатдаги ҳолат бўйича муносабат билдирди

Ички ишлар вазири маслаҳатчиси Зокиржон Алматов Фарғона вилояти Фурқат тумани ИИБ ходимлари томонидан мактаб директорининг таҳқирланишига муносабат билдирди. Бу ҳақда у ИИВ ҳузуридаги Жамоатчилик кенгаши аъзолари ва ОАВ вакиллари иштирокида ўтказилган матбуот анжуманида тўхталиб ўтди.

Алматовнинг таъкидлашича, ички ишлар идораларида ишлайдиган ҳар бир ходим ўзини психологик жиҳатдан тайёрлаши, жаҳлини жиловлай олиши керак. 

“Бу — ўтакетган ваҳшийлик. У раҳбар [туман ИИБ бошлиғи — таҳр.] қайсидир йўллар билан амалга ўтириб қолган, деб ўйлайман. Қандай шароитда бўлса ҳам, ички ишлар идораси ходими ўзини ушлашни билиши керак. Биз ўзидан кетиб қолган бундай раҳбарларни асло кечирмаймиз”, — деди у.

«Ҳар бир йиғилишда вазир, вазирлик раҳбарияти, вилоят ички ишлар бошқармаси бошлиқлари ходимлардан шу нарсани талаб қилади: жаҳлингга эрк берма, жаҳлингни жиловла, одамларни аввал яхшилаб эшит, деймиз. Ҳатто бизга жаҳл қилиб, ўзини осиб қўйганлар ҳам бўлган. Шунинг учун йигитлар, қизларимиз, эшитинглар. Инсонларга нисбатан меҳр-муҳаббат деган туйғуларнинг ҳаммаси бизда бўлиш шарт. Сиз билан биз фақат қамаш учун яратилмаганмиз. Тарбиялаш, инсонларга ғамхўрлик қилиш, уларга ёрдам бериш учун ички ишлар ходимлари бор. Шу нарса ҳеч қачон эсимиздан чиқмасин. Лекин одам бўлмайдиганларнинг қонун бўйича жазосини беришимиз шарт. Шу боис бизнинг фаолиятимизда ҳар хил одамлар учраб туради», — дейди ИИВ маслаҳатчиси.

Зокиржон Алматовнинг қўшимча қилишича, мазкур ҳолат бўйича махсус текширув олиб борилмоқда.

Эслатиб ўтамиз, аввалроқ Фурқат туманида ИИБ ходимлари мактаб директори бўлиб ишлайдиган 34 ёшли аёлни туман солиқ инспекцияси бошлиғи билан бирга ечинтириб, калтаклагани маълум бўлган эди. Улар аёлни солиқ инспекцияси бошлиғи устидан ёлғон ариза беришга мажбурлаб, калтаклаган. Гарчи ИИБ раҳбари ва ўринбосарига жиноят иши очилган бўлса-да, бу ишни содир этган ИИБ ходимлари ҳамон озодликда.
Сенат мазкур иш назоратга олинганини билдирди. Олий судга кўра, Фурқат тумани ИИБ бошлиғи ва ўринбосари 6 та модда бўйича айбланмоқда.