Мавсум бошланди: Ўқишга киритиб қўймоқчи бўлган фирибгарлар ушланди

Унда қайд этилишича, Фарғона вилояти Қўштепа туманидаги мактаб ўқитувчиси Ёзёвон туманида яшовчи 3 нафар фуқарони Қирғизистон давлат университетига ўқишга киритиб қўйишни ваъда қилган. Бунинг  эвазига эса 6600 АҚШ доллари сўраган. Сўралган пулларни олаётган вақтида ДХХ ходимлари томонидан ушланган. 

Шу каби Ўзбекистон давлат жисмоний тарбия ва спорт университети ўқитувчиси Амударё туманида яшовчи фуқарони Урганч давлат университетига ўқишга киритиб қўйишга ваъда бериб, фуқародан 5 минг АҚШ доллари пора сўраган. У сўралган пулни олаётган вақтида ашёвий далиллар билан ушланган. 

Шунингдек, фуқаронинг мазкур ишга алоқадор бўлган шериги ҳам топилган. У Ўзбекистон давлат жисмоний тарбия ва спорт университети мутахассиси бўлиб ишлаган. Шерик талаб қилинган пулларни олаётганда қўлга олинган. 

Бундан ташқари, Сурхондарё вилоятининг Термиз шаҳрида яшовчи шахс ўзининг ҳамшаҳарига пора эвазига инглиз тили бўйича “C1” даражадаги тил билиш сертификатини олиб беришга келишган. Бунинг эвазига эса фуқародан  2400 АҚШ доллари ва 1 250 минг сўм талаб қилиб олган вақтида ушланган. 

Ҳозирда ушбу шахсларнинг барчасига нисбатан жиноят иши қўзғатилиб, тергов ҳаракатлари олиб борилмоқда.