Қоракўлда 20 нафар абитуриент заҳарланиши юзасидан ССБ расмий муносабат билдирди

Бухоро вилояти Қоракўл туманида жойлашган ўқув марказларидан бирида абитуриентлар заҳарланиш белгилари билан шифохонага мурожаат қилгани ҳақида хабарлар тарқалди. Мазкур ҳолат юзасидан Бухоро вилояти Соғлиқни сақлаш бошқармаси расмий муносабат билдирди.

Маълум қилинишича, Қоракўл тумани Ҳўжалар маҳалла фуқаролар йиғини, Улуғбек кўчасида жойлашган “Илм нури” МЧЖга қарашли ўқув марказида таҳсил олаётган 20 нафар абитуриентда номаълум модда таъсирида заҳарланиш ҳолати аниқланган.

Ҳодиса ҳақида хабар келиб тушиши билан абитуриентлар зудлик билан туман тиббиёт бирлашмасига олиб келинган. Шифокорлар томонидан кўрсатилган тезкор тиббий ёрдам натижасида барча беморларнинг аҳволи яхшиланган.

Қайд этилишича, 20 нафар абитуриент амбулатор тартибда даволаниш учун уйига жавоб берилган. Ҳар бир бемор ҳудудий оилавий шифокор ҳамда патронаж ҳамширасига бириктирилган. Айни пайтда уларнинг аҳволи қониқарли бўлиб, қўшимча шикоятлар мавжуд эмас.

Экспертиза натижаларига кўра, ҳолат бўйича қўшимча маълумотлар тақдим этилиши маълум қилинди.