«Судда жабрланувчи эмас, айбдорга ўхшайман» — ИИБ ходими калтаклаган мактаб директори Саида Мирзиёевага видеомурожаат йўллади

«Мен жабрланувчи эмас, худди судланувчига ўхшайман»

Қосимова "Sirojiddin Media"га берган видеомурожаатида суд жараёни ёпиқ ўтказилаётгани ва журналистлар киритилмаётганидан шикоят қилди. Унинг сўзларига кўра, ҳар гал очиқлик талаб қилганида, «ишда махфий маълумотлар бор» деган баҳона келтирилаётган.

«Мен судда гапиролмайман, ҳатто ўз фикримни билдиришга ҳам тақиқ қўйилган. Судда жабрланувчи сифатида эмас, худди жиноятчи сифатида муносабат бўляпти», — дейди у.

Гулираъно Қосимова судьяга кўп марта эътироз билдиргани учун суддан ҳайдалганини айтади. Унинг таъкидлашича, судда ички ишлар ходимларининг адвокатлари эркин гапира олади, аммо жабрланувчи тарафнинг адвокатларига чекловлар қўйилган.

«Олий суд шунчаки ўша камера ёзувларини кўрсин — у ерда нималар бўлаётганини тушунади. Судда менга нисбатан ҳақоратлар ҳам бўлди. Мен адолат сўраганим учун жазоланмоқдаман», — дейди у.

«ИИБ ходимларининг талаби билан суд ёпиқ ўтказиляпти»

Аёлнинг таъкидлашича, суд ёпиқ тарзда ўтишини айни шу ишда айбланаётган ИИБ ходимлари ва уларнинг адвокатлари сўраган.

«Агар суд очиқ бўлса, халқ ҳақиқатни кўради. Мен ўзим оммавий ахборот воситалари киришини хоҳлаяпман. Лекин уларнинг шаънини сақлаш баҳонасида эшиклар ёпиляпти. Ахир таҳқирланган мен-ку!», — дейди Қосимова.

Унинг айтишича, суд жараёнида гувоҳлар ва айбланувчилар бир-бирига яқин ўтириб, бир-бири билан маслаҳатлашиб олаётган ҳолатлар кузатилган.

«Бу ҳолатлар менда шубҳа уйғотмоқда. Шунинг учун ишни Олий суд кўриб чиқсин, очиқ тарзда ўтказилсин», — дея талаб қилади у.

«Мени урганлар жазо олмагунча ортга қайтмайман»

Қосимова тергов пайтида ўзини таҳдидлар билан қўрқитишганини айтади.

«Улар қўлимдаги видеоларни тарқатиб юборамиз, деб босим ўтказишган. Бунинг ўзи етарли таҳдид. Сўнгра мени кийимсиз ҳолатдаги видеом билан шантаж қилишди. Ҳеч бир аёл бу ҳолатдан сўнг тинч ўтира олмайди», — дейди у.

Гулираъно Қосимова ҳар бир суд мажлисини суд очиқ бўлиши ҳақидаги илтимоси билан бошлар, аммо рад жавоби олаётганини маълум қилди.

«Судда гапиришимга рухсат берилмаса, журналистлар билан ҳам гаплаша олмасам, мен қаердан адолат излай? Мен халқдан ёрдам сўраяпман», — дейди у.

«Интернетга чиқишимни айблашади, лекин мен бошқа чора топмадим»

Қосимованинг сўзларига кўра, у интернетда видеомурожаат қилишдан аввал прокуратура ва бошқа идораларга неча бор мурожаат қилган, аммо натижа бўлмаган.

«Ҳатто журналистлар менга „тўхтанг, сизни ўлдириб қўйишади“, дейишди. Лекин мен тўхтамайман. Мен курашаётган бўлсам, бу бошқа аёллар мен каби таҳқирланмаслиги учун», — дея таъкидлайди у.

Аёлнинг сўзларига кўра, қарши томоннинг адвокатлари унинг мурожаатларини «давлатга қарши чиқиш» сифатида талқин қилмоқда.

«Мен ҳақиқатни айта олмас эканман, ҳимоя сўрай олмас эканман, унда менинг ҳуқуқларим қаерда? Менни урганлар, таҳқирлаганлар жавобгар бўлмагунча ортга қайтмайман», — дейди Қосимова.

Олий суд изоҳи

Олий суд матбуот котиби Азиз Абидовнинг маълум қилишича, ишда жабрланувчиларнинг кийимсиз ҳолатдаги видеоязуви мавжуд бўлгани учун айрим суд мажлислари махфий тарзда ўтказилмоқда.

«7 ноябр куни Қосимова суд тартибини бузгани учун огоҳлантирилган, аммо у такроран тартибни бузгани сабабли Жиноят-процессуал кодекснинг 272-моддасига асосан суд залидан чиқариб юборилган», — дейди Абидов.

Унинг маълумотича, кейинги суд мажлиси 12 ноябрь куни соат 10:00 да очиқ тарзда ўтказилади.

Жамоатчилик муносабати

Гулираъно Қосимованинг суддан чиқарилиши ва унинг интернетдаги кибербуллинг ҳужумларига учраётгани фаоллар норозилигига сабаб бўлди.

Ҳуқуқшунос Камола Алиева бу ишни «жамиятнинг инсонийлик ва адолатга муносабатини кўрсатувчи кўзгу» деб атади.

«Аёлнинг шаъни эмас, ҳуқуқи муҳим бўлиши керак. Ҳозир эса у интернетда иккинчи марта таҳқирланмоқда. Бу нафақат бир инсон, балки бутун жамият адолат тамойилларига қарши ҳаракатдир», — дейди Алиева.

Журналист Илёс Сафаров ҳам Гулираъно Қосимовага қарши уюшган киберхужумлар кетмоқда, деб ҳисоблайди.

«Фарғонадаги блогер ва троллар орқали уни қоралаш, ИИБни оқлаш ҳаракатлари олиб бориляпти. У бир неча бор таҳқирланган, ҳатто ўз жонига қасд қилган, аммо адолатга ишониб қайта турибди. Энди эса у кибермаконда ҳам ҳимоясиз қолди», — дейди Сафаров.

Блогер Шаҳноза Соатова эса қўшимча қилади:

«Аёлни обрўсизлантириш осон, бир туҳмат етарли. Унинг „бузуқлигига“ ишонишга тайёр катта масса бор. Бу фақат Гулираъно эмас — бу тизим муаммоси», — деб ёзади у.

Эслатиб ўтамиз, Фурқат туманида ИИБ ходимлари 34 ёшли аёлни калтаклаб, ечинтириб, таҳқирлагани аниқланган эди. Улар аёлни солиқ инспекцияси бошлиғи устидан ёлғон ариза ёзишга мажбур қилган.

ИИВ раҳбарининг маслаҳатчиси Зокиржон Алматов бу ҳолат юзасидан фикр билдириб, «тизим бундай раҳбарларни кечирмаслигини» таъкидлаган. Сенат ишни назоратга олган, Олий суд маълумотига кўра, Фурқат тумани ИИБнинг собиқ бошлиғи ва ўринбосари олтита модда бўйича айбланмоқда.

8 октябрь куни Қува туман судида мазкур иш бўйича суд жараёнлари бошланган.